Thursday, March 5, 2015

NISTC PUBLIC MARKET UPDATE 2015

Cabugao, Ilocos Sur – Segun ken ni Mrs. Norma S. Bertumen, Market Supervisor ti NISTC Public Market, a kitkitaenda met iti napintas a pannakaipaay ti serbisio kadagiti aggatang babaen iti pannaka-calibrate dagiti pagkiluan dagiti aglaklako iti nadumaduma a pagbiag iti uneg ti Tiendaan ti Cabugao. 

Innayon ni Mrs. Bertumen nga adda regular a koordinasion kadakuada  ken panagmonitor ti Department of Trade and Industry (DTI)-Vigan City iti pakaseknan iti presio ken pagkiluan iti Tiendaan. Naipasdek ti masasao a: “Timbangan ng Bayan” iti dua a disso, ti  kanatengan ken kakarnean/kaikanan tapno adda pangpasingkedan dagiti aggatgatang no umisu met laeng ti kilo iti nagatangda ken agpatingga laeng iti 15 Kilograms ti pagkiluan a libre. 

Malaksid iti pannakamonitor iti presio, pagkiluan, pasilidades ti tiendaan ket maipampamaysa iti pannakamantener ti kinadalus  ti uneg ken aglikmut ti tiendaan nangruna kadagiti Comfort Rooms (CRs). 

Nupay kasta, agtultuloy  ti umay makitienda uray pay kadagiti agindeg iti kabangibang nga ili nangruna kadagiti Holiday Season kas iti masungad manen a Semana Santa a mangpaadu ti malakuan dagiti adda iti puestona iti Tiendaan.

Dagitoy nga agtultuloy a panagsayaat ti Tiendaan  ket gubuay iti nasamay a Direktiba ni Mayor Edgardo “Ediboy” S. Cobangbang, Jr. nga ipatungpal  ti Management Staff  ti NISTC Public Market. 

Iti sabali a bangir, segun ken  ni Market Supervisor Norma S. Bertumen, Market Supervisor a pinaregtana ti agtultuloy a pannakalinis a nasayaat ti las-ud ti Tiendaan (NISTC Public Market)  maigapu kadagiti sumaruno a napaut a Holiday. Innayonna a tumulongda a mangbunag kadagiti dadduma pay a wara nangruna kadagiti selopin (non-biodegradable materials) ket agtultuloy nga isayangkat dagiti Personnel ti NISTC Public Market a tumulong nga agikkat kadagiti rugit.

Innayonna pay a maar-aramid iti pannaka- “Flushing” iti basar ken stalls iti paglakuan ti ikan ken karne ket naasikaso pay ti septic tank kasta met a  maigidgiddan ti inspeksion kadagiti ambulant vendors babaen iti panagpasiar ken panangpalagip ti Public Sanitary Inspector ti LGU-Cabugao kadagiti Food Handlers nga aglaklako iti ikub ti Tiendaan ket naidagadag iti pannakaipabaro ti lisensiada ita a Tawen 2015.

Malaksid iti uneg ti Tiendaan, agtultuloy met ti koordinasion ti Opisina ti MENRO-LGU Cabugao ken ni Mrs. Bertumen iti agtultuloy a pannakadalus ti agsumbangir ti Kalsada Nasional a batog ti Tiendaan agraman kadagiti drainages tapno agtultuloy a nasigo ti sanitasion ken nasalun-at nga aglawlaw ti NISTC Public Market a para met laeng iti sapasap. # (Web Situational Report)

No comments:

Post a Comment