Cabugao, Ilocos Sur – Kas panagsagana iti umay a bulan ti panagtudona, inaldaw a palangtuen dagiti kameng ti DA-LGU nga idauluan ni Municipal Plant and Nursery Coordinator Mr. Robert S. Savella, AT babaen iti pannakasibogda nga inaldaw gapu iti panagsig-at ti dam-eg a gubuayen ti idadateng ti kalgaw.Kaaduan kadagiti napatanor a seedlings ti mangsustener iti programa ti Munisipio iti Clean and Green Program/Tree Planting kadagiti watershed, bakante a lote, igid ti karayan ken kalsada kangrunaan kadagiti barangay.
Imbatad ni Mr. Savella nga umabot ti 10,000 a seedlings ti nagyan iti municipal plant and nursery iti agdama ket mapalpalangtoda babaen iti inaldaw a pannakaasikasoda tapno masagsagana para iti Tree Planting a maigannuat kadagiti matutudo a bulbulan.
Ti Municipal Plant and Nursery ti Munisipio ket katinnulongna dagiti programa ti NTA-Cabugao Office ken iti High Value Crops Development Program (HVCDP)-DA iti agtultuloy a panagmula ti kayo babaen iti maiwayat ken nasaknap a Tree Planting Activity/Plant Survivability Program a maigannuat iti intero a Munisipalidad ti Cabugao iti kallabes ken iti masanguanan. # (Web Situational Report)
No comments:
Post a Comment