Friday, March 6, 2015

WATER RATIONING, MAIPAKPAKAT MANEN

Cabugao, Ilocos Sur – Iti pannakiuman ti Web In-Action idi Marso 5, 2015,  imbatad  ni Superintendent Engr.  Nestor B. Somera a madama ita iti scheme-da (wagasda)  iti  pannakaipakat ti water rationing iti sumagmamano a barangay a masakupan/maserbisyuan  ti Cabugao Waterworks.

Innayonna a maikonsidera latta ti “climate change adaptation”  kas kadagiti sumaganad a makagapu n angruna iti summer months:

1. Makamat  ti agtartaray a danum iti Aquifer (kaunggan nga urat ti ubbog iti uneg ti daga) ta adu ti bubon iti aglawlaw   a mangkunnot ti ubbog nga usaren ti tao a pagpadanumda iti mulada ken dadduma pay a pakausaranda.

2.  Apektado ti lokalidad iti napalpalabas a napasamak a ginggined segun iti na-sientipikuan a panagsukisok.

3.  Napaut ken  nakirang a kaawan ti tudo a mangnayon koma ti suplay ti ubbog.

Kabayatanna, maar-aramid ti water rationing kadagiti sumaganad a disso:

Brgy. Sagayaden, Bessang, Turod Patac,  Marga-ay, Bonifacio (along the National Highway), NIA Road-Brgy. B onifacio ken dadduma a parte ti Brgy. Cuancabal ken iti sumagmamano  iti deppaarna iti daya a barangay.

Maaramid ti Water Rationing iti dua nga eskediul: 1:30 pm agingga iti 4:30 pm ken 7:00 pm agingga iti 5:00am.

Innayon pay ti Waterworks Superintendent a kankanayon met a mamonitor dagiti watershed area/pasilidad ti potable springs   a mangsakup iti Water Sources kas iti Magarang Spring Falls  idiay Barangay Cacadiran,  Cabugao, Ilocos Sur ken iti Roma-Kinalian Springs a masarakan iti Brgy. Maradodon ken Catucdaan kas panagsaganadda.
Nupay kasta, madagdagus  a maaksionan babaen kadagiti Waterworks Personnel no kasapulan ida dagiti water consumers iti aniaman a pakaseknanda iti danum. # (Web In-Action)

No comments:

Post a Comment