Cabugao, Ilocos Sur – Naaramid ti maikatlo a parang (Marso 21, 2015) ti “Laing ti Talugading, Show Me, What You’ve Got”, programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. a maysa kadagiti naisangayan nga aktibidad a mangkulminar iti panagpiesta ti ili (Ragsak Cabugao Festival 2015) inton Abril 21-25, 2015 ken mangtakuat/mangmuli kadagiti talento/kabaelan iti benneg dagiti umili iti Cabugao, Ilocos Sur tapno pakairanudan dagitoy.
Nairugi ti nadakamat a pakontes idi Marso 7, 2015 (rabii ti Sabado) idiay Auditorium ti Cabugao Central Park (CCP) ket maikatlo a Sabado ti pakontes iti Marso 21, 2015 a no sadino a ditoy ket nagbuyaan manen ti adu nga umili gapu iti makaparay-aw/makaliwliwa nga impabuya dagiti nagpartisipar iti dayta a sardam.
Maaramid ti pakontes iti nabatbati pay a Sabado. Iti umuna, ket nagsasalipan dagiti agad-adal iti Sekundaria iti ili (private ken public) ket napili dita iti tallo a kangrunaan a nakisalip (Elimination) a maisagana a Finalist para iti Grand Finals a naituding a maaramid inton Abril 22, 2015.
Napasamak ti “Laing ti Talugading” iti maikadua a Sabado ket binukel dagiti nagsasalip dagiti agad-adal iti nadumaduma a pagadalan-Elementaria iti ili.
Iti maikatlo a Sabado, naituding nga “Open for all” daytoy a pasalip ken buklento met ti Non-Government Agencies (NGA’s) ken NGO’s dagiti agsasalisal iti maikapat a Sabado (Marso 28, 2015) iti bulan ti Marso 2015.
Kas iti napalabas a Sabado a pannakaaramid ti “Laing ti Talugading”, nagpaay a Program Hosts da Ms. Odette Vallejo Somera ken ni Mr. Dharen Jake Repollo Garcia, agpada a mangisursuro ken buklen dagiti nagpaay a Hurado dagiti maresrespeto iti kabaelanda iti kastoy a tay-ak ti paglaingan. # (Web In-Action)
No comments:
Post a Comment