Monday, March 16, 2015

KABAELAN KEN TALENTO DAGITI UBBING, NAIPAKITA ITI “LAING TI TALUGADING

Cabugao, Ilocos Sur – Naaramid ti maikadua a parang (Marso 14, 2015)   ti “Laing ti Talugading, Show Me, What You’ve Got”, kabarbaro a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. a maysa kadagiti naisangayan nga aktibidad a pangparagsak  iti  umadani a panagpiesta ti ili (Ragsak Cabugao Festival 2015) inton Abril 21-25, 2015 ken mangtakuat/mangmuli kadagiti aglemlemmeng a talento/kabaelan iti amin  a benneg ti kagimongan dagiti umili iti Cabugao, Ilocos Sur tapno pakairanudan dagitoy.


Agduduma ti klasena iti naiparang a maisalip ken nabuya a kas iti panagkanta, panagsala (Folk Dance),  Rap ken Gymnastic.

Nairugi ti nadakamat a pakontes idi Marso 7, 2015 (rabii ti Sabado) idiay Auditorium ti Cabugao Central Park (CCP) ket maikadua a Sabado ti pakontes iti Marso 14, 2015 a no sadino a ditoy ket nagbuyaan manen  ti naruay nga umili gapu iti makaparay-aw/makaliwliwa  a parang dagiti nagpartisipar iti dayta a sardam.

Maaramid ti pakontes iti dua a nabatbati pay a Sabado. Iti umuna, ket nagsasalipan dagiti agad-adal iti Sekundaria iti ili (private ken public) ket napili dita iti tallo a kangrunaan a nakisalip (Elimination)  a maisagana a Finalist para iti Grand Finals a naituding  a maaramid inton Abril 22, 2015.


Napasamak ti “Laing ti Talugading” iti maikadua a Sabado ket binukel dagiti nagsasalip dagiti agad-adal iti nadumaduma a pagadalan-Elementaria iti ili.

Iti maikatlo a Sabado, naituding nga “Open for all” daytoy a pasalip ken buklento met ti Non-Government Agencies (NGA’s)  ken NGO’s dagiti agsasalisal iti maikapat a Sabado ti bulan ti Marso 2015.

Kas iti umuna a Sabado a pannakaaramid ti “Laing ti Talugading”, nagpaay manen a Program Hosts da Ms. Odette V. Somera ken ni  Mr. Dharen Jake R. Garcia,  agpada a mangisursuro ken buklen dagiti nagpaay a Hurado dagiti maresrespeto  iti kabaelanda iti kastoy a tay-ak ti pagsasalipan. # (Web In-Action)

No comments:

Post a Comment