2 A SEMINAR PANG-AGRIKULTURA, BALLIGI A DIMTENG DAGITI NAGATENDAR

Cabugao, Ilocos Sur – Naballigi a simmangpet ditoy ili a Cabugao ti dua a naibaon a nagseminar iti nasional a taripnong: maysa nga empleado ti DA-LGU a  pannakabagi ti agrikultura ken maysa a  pangulo ti asosasion dagiti mannalon ti Munisipalidad  ket manamnama ti panangyawidda ti sirib ken adal para kadagiti mannalon iti Munisipalidad ti Cabugao.

Inatendaran ni Mr. Elmer Guerrero Bromeo, Federated Farmers President ti 4 nga aldaw ti “Makina-Saka 2012” 2nd Agri-Machinery Roadshow, Conference of Irrigators Associations and Agricultural & Fishery Councils idi Hulio 4-7, 2012 iti World Trade Center, Manila.

Naiparang dagiti nagduduma ti buyana  a makinaria ken nayadal ditoy a seminar ti pananggun-od  ti asosasion tapno mairamanda met nga agnam-ay kadaytoy a programa ti Gobierno Nasional babaen ti panangimaton ti  Departamento ti Agrikultura (DA).

Nakitaripnong ni Presidente Benigno C. Aquino 111 iti kaaldawan ti Hulio 5, 2012 iti nasao a seminar.

Imbatad ni Mr. Bromeo a papigsaenda ti Pederasion  ken mairehistroda amin ti asosasion  tapno makasagrapda kadaytoy (85-15 equity) counter-scheme a programa ti Gobierno.

“Kas pangulo ti Pederasion ti mannalon ti Cabugao, makinamingkami a nasayaat iti Gobierno Munisipal nga idauluan ni Mayor Ediboy tapno sapasapkami a mannalon a  maipaayan ti pagsayaatan kadaytoy a programa ti DA,” innayon ti Federation President.

Iti sabali a bangir, dimteng metten ni Mr. Nereo S. Daproza, Municipal Rice Program Coordinator  iti nakiseminaranna idiay Clarin, Misamis Occidental idi Hunio 25-Hulio 4, 2012. Imbatad ni Mr. Daproza nga impamaysana nga immutektekan ti sirib a naalana iti seminar ken  imbingayna  ti  padas ti Munisipalidad-na iti pannakaidur-as ti teknolohia ken kaammuan ti mannalon.

Panggep ti seminar a patauden ti maysa a lokalidad ti kabaelan ti mannalon nga agpatanor iti  bukodda a  klase (breeding)  ti pagay, teknolohia ken maibagay  iti “ecosystem”   kadayta a pakaipakatan ti programa tapno agballigi  ti panggepna.

Dinakamat ni Daproza ti pammigbig ti DA  nga iti kina-receptivity ti mannalon panggep ti programa ti DA ditoy Cabugao  ken ti  very supportive  nga  LGU  kas partner-da ti kangrunaan a nakapilianna a  nagseminar a nangibagianna ti Ilocos Sur.  # (Web In-Action)