Cabugao, Ilocos Sur – Ni Mrs. Melvi Siababa Sajonia, 46, ket mangrugi ita nga aldaw, Hulio 19, 2012 nga agopisina iti Cabugao South Central School kas Principal 2. Nagserbi a Principal iti Turod Elementary School iti lima a naririmat a tawen gapu iti pagwadan a gapuananna kas Edukador. Naapointaran a Principal 2 iti CSCS babaen iti DepEd Division Superintendent Office idi Hulio 5, 2012.
Iti early dinner party nga insagut dagiti kaduana a mangisursuro iti Turod ES idi Hulio 18, 2012, bin-ig a pammadayaw ken ayat ti inyebkas dagiti co-teachersna gapu ti laingna nga agidaulo ken mangisuro, napakumbaba ken mannakilangen iti komunidad, ken tinamingna ti pagsayaatan dagiti co-teachersna.
Nagatendar iti nasao a pasamak da Schools Division Superintendent Marino S. Baytec, District Supervisor Helen V. Siruno, Brgy. Captain Inocencio S. Sadac, pangulo ken mangisursuro ti nadumaduma a pageskuelaan ti barangay ti Munisipalidad, nagannak, sangaili ken bumarangay.
Ni Principal Melvi ket produkto ti CSCS ken Cabugao Institute. Nagturpos ti BSEEd idiay MMSU Laoag City idi 1985. Naturposna ti MA in Education iti UNP Vigan City ken Baguio Central University. Nalpasna ti Academic Requirements ti Doctor of Education iti UNP.
Nangrugi a nagisuro iti nadumaduma a pageskuelaan ti Cabugao ket naragpatna ti posisionna babaen iti gaget, sirib ken anusna nga agadal. Aktibo a makigamgamulo kadagiti pagsayaatan ti eskuela ken Munisipalidad sakbay ken uray iti agdama a pannakagun-odna ti akemna.
Taga-Brgy. Cuancabal, Cabugao, Ilocos Sur isuna. Inauna iti 6 nga annak da Victorino Castaneda Siababa ken Melchora Saturno Solar. Nayasawa ken ni Nestor C. Sajonia, maysa nga OFW Seaman. Addaanda iti 3 nga annak: da Neisel Ruth, RN, iti RHU; Neo Lester Marco ken Neric Vins, agad-adalda pay laeng ti Kolehio ken Elementaria kas panagsaganadda. # (Web In-Action)
No comments:
Post a Comment