DENTAL-MEDICAL MISSION PARA ITI DISABLED, NAIYUSUAT

Cabugao, Ilocos Sur – Naiwayat ti Dental-Medical  Mission para kadagiti adda rikriknaenna nga ubbing iti SPED (Special Education) ti DepEd Cabugao District nga idauluan ni Public Schools Supervisor Helen V. Siruno ket  STAC-Cabugao ita a Hulio 16, 2012 iti Cabugao South Central School.

Buklen dagiti nag-mision da Dr. Maribel G. Roque, DMD,  Dr. Lynn P. Bueno, M.D.  ken Ms. Medy P. Bueno iti Rotary Club International-Magsingal Chapter.

Binayabay ida dagiti SPED Teacher ken STAC-Cabugao Staff  agraman da District Supervisor Helen V. Siruno, OIC Principal  Carlito Anor ti South Central School, Incoming Principal Melvi S. Sajonia iti South Central School ken mangisursuro iti nasao a pagadalan.

Daytoy a panagtulong ket pangselebrar ti 34th National Disability Prevention and Rehabilitation Week. Umabot ti 32 nga ubbing ti immuna a nagsangpet a naasikaso a binayabay dagiti nagannak kadakuada.

“Kayatmi met a dakamaten  iti selebrasion ti dakkel a maitultulong ti LGU nga idauluan ni Mayor Ediboy Cobangbang, Jr.” imbatad ni SPED Teacher  Mrs. Jonel S. Rabara ti Daclapan Elementary School. “Aksyon agad no agkalikagumkami  iti pagsayaatan ti SPED. Mamatikami a very supportive ti LGU uray dikami pay sinunotan ti agkiddaw”.

Panagyamanda  iti LGU ken DepEd ti kaipapanan ti pannakiuman ti Web In-Action kadagiti nagannak.

“Agtultuloy koma daytoy a tulong ken sapay ta manaynayonan,” kinuna ni Mrs. Fely Garcia ti Brgy. Turod.

“Dakkel ti pagnaan ti pannakaisuro, pannakaagasda  ket uray kastoyda agyamankami ta naynayonan ti Gobierno  ti ayat a maited kadagitoy nga annakmi,” insupusop met ni Ms. Aileen Aganad ti Brgy. Daclapan.

“Umel ti anakko ngem umayko latta ipakita ken anusak nga aywanan ti panagadalna. Nalaing la ket nga agsurat, aglasin, dakkel metten a pagsadaganna,” innayon met ni Mrs. Mercy Cabasug ti Brgy. Daclapan.

Imbatad ni District Supervisor Helen V. Siruno a planoda a maipan  ti SPED School iti compound ti eskuela kas iti STAC tapno nadardaras a makikaysa no adda dagiti aktibidades a maipatungpal a kas itoy.

Napasingkedan a babaen kadagitoy dua nga institusion a mangas-asikaso iti edukasion dagiti adda rikriknaenna nga ubbing ket dakkel ti maitulongna iti biag dagiti maseknan.

Ti STAC-Cabugao ket adda iti babaen ti LGU-Cabugao nga imatonan ti MSWDO ken ti SPED ket programa  met ti DepEd. Nupay kasta, agpadpada dagitoy a matulongan ti Gobierno Munisipal ti Cabugao babaen ti programa  para iti pannakataming ti pakaseknan dagiti ubbing nga adda an-annayenna. # (Web In-Action)