Tuesday, July 10, 2012

ASOSASION TI MANGNGALAP, NAPATIBKER

Cabugao, Ilocos Sur – Nareorganisa ti Pug-os Farmers Association a nakapilian ni Mr. Alfonso Asunio a Presidente  agsipud ta kayatda met a yapal ti gimongda iti  naregget ita a pagturturongan dagiti asosasion ti  NGO’s iti Munisipalidad ti Cabugao.

Inasistiran  ti pannakabagi ti DA-LGU, ni Mr. Obas Bill Y. Baclig, AT ken mayannatup iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. nga agsalukag dagiti asosasion a mangprobitsar iti pagsayaatanda iti serbisio ken tulong  nga ipaay  dagiti maseknan nga Ahensia ken Opisina. 

Kabayatan a naidatag ti Constitution and By-Laws-da idiay Opisina ti DOLE para iti rehistrasionna, ar-aramidenen ti asosasion ti pagrebbenganna iti komunidad babaen iti pannakipasetda ti panagmula ti mangrove iti aplaya ken coastal-clean up ti igid ti baybay ti Brgy. Pug-os.

Naituding a kada maudi a Domingo ti Monthly Meeting-da iti ala una ti malem (1:00 pm) iti Dap-ayan, Purok Salun-at, Brgy. Pug-os.

Dadduma nga opisiales  ti asosasion: Jovencio Saupan, Vice President; Fernando Baclig, Secretary; Armando Iniba, Treasurer; Wilson Asunio, Auditor; Romulo del Rosario, PRO. Addaan ti asosasion ti 31 a miembros iti agdama. # (Web In-Action

No comments:

Post a Comment