AKREDITASION TI SENIOR CITIZEN CENTER, MAARAMID

Cabugao, Ilocos Sur – Nagmiting ti Pederasion ti nataengan ita nga aldaw, Hulio  31, 2012 iti Senior Citizen Center, Brgy. Rizal, Cabugao, Ilocos Sur  babaen ti panang-Preside ni Mr. Antonio N. Sabio, Federated President  tapno tratarenda dagiti kasapulan a mapaadda iti pannaka-akreditar ti Federated Senior Citizen’s Center ti Cabugao, Ilocos Sur  tapno   maiyintek ti tulong manipud iti nangatngato nga Opisina.   

 

 

 

Iti nasao a panagtitipon, naigiddan ti naipaay a  Medical Service dagiti Personnel  ti RHU kadagiti nataengan. Kaaduan ti nagpa-Blood Pressure ket no adda matakuatan a nakaro ti  an-annayenna  ket maipanda iti RHU ta amirisen ti Doktor sa maagasan. Kadawyan a mapasamak daytoy no adda mitingda ket pagyamananda iti Munisipio ta  dakkel ti maitulongna kadakuada a nataengan, segun ken ni Mr. Orencio Sadioa, Opisial ti Pederasion.

          Kalpasan a napagnanamingan dagiti maaramid ken maisubmiter a Papers for Accreditation, na-update pay ti Financial Resources ti Pederasion.

          Imbatad ni Mr. Remigio B. Sunico, OSCA Head a mangiparuarda ti  Newsletter ti Senior Citizen agingga iti Disiembre 2012. Bininsana nga agpannurayda iti makalapda nga advertisements, compliments ken tulong manipud iti LGU-MSWD kasta pay ti dadduma nga NGO’s. Innayon ni Mr. Sunico a daytoy ti ramit a  mangiwarnak ti pateg dagiti plano ken programada a nataengan iti panagkaykaysada a kas maysa a  gunglo  iti kagimongan. # (Web In-Action)

MAYAT LATTA TI OPERASION TI DAYO

Cabugao, Ilocos Sur – Kaaduan ita  nga  agar-aramid  ti transaksion  ket dagiti koridor a  bumulbulod ti puonan iti Dayo Management. Nagbaliw   ti apagapaman   ti  gunay   dagiti  self-financed nga aggatang gapu ti gawat.

 

 

 

 

Nupay kasta, uray agbaliw  ti bilang  ti transaksion (naka-7 a transaksion  idi Hulio 28, 2012) a kaaldawan ti Dayo, kuna dagiti opisiales a mayat pay laeng ti panaglayag ti operasion ti Dayo. Ti importante, natalged ti kasasaad ti puonan ken maipenpennek met a maipakat ti panaggatang dagiti naridridam  a cattle buyer.

Saan met  a nagliway da Mr. Dante Naval, Municipal Meat Inspector ken Dr. Melvin Castro, DVD, Municipal Livestock Inspector a makitintinnarabay kadagiti maseknan     tapno matimonan ti agtultuloy a  napintas a panagoperar ti Dayo-Cabugao. # (Web In-Action)

CUTTING OF THE RIBBON, NAGATENDAR NI MAYOR EDIBOY

Cabugao, Ilocos Sur – Naaramid ti pannakabendision ken pannakagetteng ti laso a mangipalnaad ti pannakaisibro ti baro a pasdek-pagadalan iti Sisim National High School ita a  Hulio 30, 2012 iti mismo a sango ti baro a pasdek iti Compound ti Sisim National High School.

 

 

 

 

 

 

Daytoy  a baro a pasdek ket nagun-od babaen  iti panangilungalong ni Mayor Edgardo “Ediboy” S. Cobangbang, Jr.  iti nasged a kalikagum dagiti Teaching Staff nga idauluan ni Mrs. Rosemelinda D.  Baclig, nagannak ken lumugar nga idauluan ni Brgy. Captain Ruben Siruno ti Barangay Sisim manipud iti Department of Education.

Nagatendar met dagiti agad-adal, nagannak, lumugar ken naggapu iti kabangibang a barangay nga adda pagad-adalenna iti Sisim NHS.

Iti panagsaritana, dinayaw  ni Dr. Romeo Berzabal, EPS 1 (Science)  a nangibagi ken ni Dr. Marino S. Baytec, Ed. D. CSEE, Division Superintendent iti panagiwardas ni OIC Head Teacher Rosemelinda D. Baclig iti pagsayaatan ti  pagadalan, mangisursuro ken ubbing   ket imbatadna a manayonan ti agisuro ditoy tapno maisagut  met ni Mrs. Baclig.

Impasagepgep ti Opisial ti DepEd ti kaipapanan ti “Accessible Quality Education” a programa ti DepEd ken iti Gobierno Nasional. Maigunamgunam a manayonan ti eskuela ken agisuro kas panagsagana ti programa ti P-Noy Administration  iti  K 12. Binigbigna pay  ti tulong nga aggapu iti LGU ken Kongresional a mangan-anay iti dadduma pay a  kasapulan ti programa ti Edukasion partikular iti Sisim NHS.

Sipapakumbaba ni Mayor Ediboy a nangibaga a naikkan ti talek nga agidaulo  ket isublina  met la dayta a talek babaen iti napudno a serbisiona  para iti umili. Binigbig ti Alkalde ti pateg ti panagtitinulongda  iti LGU a mangipaay  ti pagsayaatan ti pagadalan ti Sisim NHS.  

Ingunamgunam ti Alkalde  kadagiti nagannak ken agad-adal a maysa a napateg nga oportunidad ti pannakaisaad ti pagadalan ti haiskul ditoy a deppaar. Ket kasapulan a probitsarenda dagiti serbisio a kasapulanda nga  itden  dagiti adda iti Gobierno ta  pagrebbenganda a tumulong iti pagimbaganda  nangruna iti benneg ti  Edukasion.

Naiballaet dagiti intermission number dagiti agad-adal  a nangparagsak ti programa. Nagyaman ni Brgy. Captain Ruben Siruno iti LGU ken  DepEd iti nainayon manen a pagimbagan iti pageskuelaan ti haiskul iti Sisim iti panangserrana iti programa.

Addada  met a nagatendar da  Ms. Beth Tabin, Supply Officer ti DepEd,  opisiales ti barangay ken dadduma nga   organisasion iti Barangay Sisim iti nasao a seremonia. # (Web In-Action)

PANAGDALDALUS, AGTULTULOY A MAIPAKAT

Cabugao, Ilocos Sur – Mayataday ti panangigunamgunam ti maseknan  a grupo ti LGU Personnel ti panagdaldalus iti aglawlaw tapno tumulong pay a manglapped ti panagraira ti sakit.

Kas nakuna ni Dr. Lotgarda “Loty” Tayao, Municipal Rural Health Physician a “Cleanliness is Health” idi kauman ti Web In-Action.  Panagdaldalus ti kangrunaan a maisupusopna nga aramiden ti tao kabayatan ti  pannakataming  ti sagubanit ken sakit nangruna dagiti ubbing.

Iti agsumbangir ti masakupan ti National Highway iti Poblasion, maikagkagumaanan met a ma-grass cutter dagiti dumakkel a ruot ken maipakni dagiti makasipar a ruting a gubuay ti napalabas a bagyo.

Imbatad ni Mr. Edgar S. Balangatan, AT-DA ken MENRO-Designate ken Coordinator ti Clean and Green Activities ti Munisipio a nakaalerto ita dagiti imatonanna nga agdalus kadagiti pang-publiko nga espasio ken mairaman metten idiay Ecology Center.

Innayonna a daytoy ket saan laeng a para iti bisita wenno balikbayan a maisar-ong  iti Munisipalidad no di pay ket iti pagsayaatan ti sapasap a sanitasion.  # (Web In-Action)

2 NGA AKTIBIDADES, PABOR TI SEKTOR-MANNALON

Cabugao, Ilocos Sur – Naaramid ti linawas a sesion ti Farmers Field School ti Farmers Association ti Brgy. Pug-os ken Guest-Participants dagiti pannakabagi ti FA’s  ti Brgy. Nagsantaan ken Brgy. Maradodon idi Hulio 26, 2012  iti Barangay Stage ti Barangay Pug-os, Cabugao, Ilocos Sur.

           

          Ti nayadal ita ket iti AESA 1 ti Group 1,2,3,ken 4 kas paset ti module a naggapu iti DA-RFU 1-ATI ken nagasistir da Mr. Nereo S. Daproza, Mr. Robert S. Savella ken Mr. Obas Bill Y. Baclig, agpapada a Teknisian iti DA-LGU Cabugao kadagiti lead-presentor iti grupoda   kas napagnunumuanda  iti panagtaming iti talonda (learning field).

          Naregget ken nabunga ti resulta daytoy a panagadal kas ipalnaad ti 99% nga attendance ti Farmers-Participants ti maar-aramid nga FFS.

          Iti sabali a bangir, naaramid met ti Technical Briefing dagiti opisiales ti mannalon ti Barangay Bungro iti dayta met la a petsa iti Barangay Hall ti Brgy. Bungro. Inlawlawag ni Dr. Reynaldo Castro, PhilRice Officer (Batac City Office) ken Mr. Edwin Franco, DA-Provincial Center, Ilocos Norte, agpada a pannakabagi  ti CPAR (Community-Based Participatory Action Research) pakaseknan ti “Water Saving Technologies” ti programa.  Kinuyog ni Municipal Agriculturist Zenaida S. Andrada, DA-LGU Cabugao dagiti sangaili nga opisiales  nga immallatiw iti Barangay Pug-os a napananda nakisaritaan kadagiti opisiales met ti mannalon ditoy  a  kadua ti Barangay Bungro a mabenepisiaran iti programa ti CPAR. # (Web In-Action)

3 A KATEGORIA TI NAKAPADAYAWAN TI CABUGAO ITI DENR

Cabugao, Ilocos Sur – Impaay ti Department of Environment and Natural Resources (DENR) Central  Office ti tanda ti pammadayaw iti Munisipalidad ti  Cabugao, Ilocos Sur babaen ti panangyawat ni Forester Eduardo Malasig, EMB Specialist, DENR, Central Office ti Certificate of Recognition  ken ni Municipal Agriculturist Zenaida S. Andrada, DA-LGU agraman kakaduana  a dagitoy ti  nangibagi ken ni Mayor Edgardo S. Cobangbang, Jr. ita a Hulio 26, 2012 iti Opisina ti Mayor.

Kastoy ti linaon ti Sertipiko ti Pammadayaw: “For sustained good performance in the implementation of RA 9003, the Ecological Solid Waste Management Act 2000 through the segregation at source, segregation collection and establishment and operationalization of material recovery facilities.”

Ti Sertipiko ti Pammadayaw ket pinirmaan ni DENR Secretary Ramon J. P. Paje, Chairman, National Solid Waste Management Commission ken maigiddan ita a tawen  ti selebrasion ti maika-11 nga anibersario ti pannakaipakat ti ESWM Act 2000 iti sangapagilian. # (Web In-Action)

FERTILIZER SUBSIDY, MAIKKAN MET DAGITI AG-NATENG

Cabugao, Ilocos Sur – Mairaman a maikkan ti Fertilizer Subsidy dagiti Off-Season Vegetable Farmer iti Munisipalidad, segun ken ni Mr. Nereo S. Daproza, AT/DA-LGU. Daytoy a gannuat ket inaprobaran ni Mayor Edgardo “Ediboy” S. Cobangbang, Jr. tapno matulongan met dagiti agmulmula ti nateng iti barangay tapno agtultuloy ti kaadda ti suplay  iti Merkado Publiko (NISTC), maitandudo ti panagtaraon ti nateng ken maingato ti matgedan dagiti mannalon. Nangrugi ti panagited ti libre a ganagan idi Hulio 20, 2012.

 

Kabayatanna, maikkan met   ti Fertilizer subsidy (1/2 sack) ti tunggal pageskuelaan ti 31 a barangay tapno adda usarenda kadagiti vegetable garden-da ta katulongan  ida ti LGU a mangipromot ti Nutrision para iti sapasap, innayon ni Daproza. # (Web In-Action)

INBRED-HYBRID RICE: VERIFICATION TRIAL

Cabugao, Ilocos Sur – Nangiyusuat ti programa ti rice verification trial ti DA-Provincial Center (Batac City-based) idiay Brgy. Quezon, Cabugao, Ilocos Sur iti 1 ektaria a talon ni Mr. Nelson Sivila, dati a cooperator ti rainfed demo-area ti ILIARC, Ilocos Integrated Agricultural Research Center a nakabase iti Batac City, Ilocos Norte.

          Panggep daytoy a programa a pagdiligen ti kapabilidad ti Inbred ken Hybrid iti panagtan-ay ken maapit iti agduduma a disso. Maysa a konsepto daytoy ti panagsukisok ni Mr. Edilberto V. Santiago, Rice Researcher, Ilocos Sur tapno nadardaras a mapasagepsepan dagiti mannalon a narigat a mangidisso ti kadaanan a bin-i  ti panagpagay tapno sumurotda iti kabaruanan.

 

 

           Iti pannakiuman ti Web In-Action ita a Hulio 25, 2012, imbatad ni Mr. Sivila a makaap-apit ti umabot 120 kaban ti kada ektaria ti Hybrid idinto ta 100 ti Inbred no Wet Season Crop (Hunio-Nobiembre) a kalabon ti danum ngem 60 kaban laeng ti apitenna ti Hybrid idinto ta nababbaba latta  ti inbred no Main Crop (Nobiembre-Mayo) a kakiddit ti danum. Awan ti irigasion ti talonna ket agpannuray iti arubos ti surong ken mainayon pay a tudo.

          Dagiti  Cooperators ti Hybrid ket da Eric Tagayuna ken Maximo Tagayuna ti Brgy. Quezon idinto ta Inbred ken ni Mr. Nelson Sivila, agkakaduada  iti daytoy a maaramid a verification trial.

          Mayataday met daytoy  a gannuat a makatulong iti  pannakaidur-as ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakaadaptar ti sapasap a panagusar ti kabaruanan a bin-i ken Teknolohia ti panagpagay tapno agtultuloy a maingato ti apit dagiti mannalon iti Munisipalidad. # (Web In-Action)