PAFC MONITORING TEAM, IMMAYDA DITOY CABUGAO

Cabugao, Ilocos Sur (Agosto 30, 2012) – Naaramid ti maikadua nga eskediul ti  panagmonitor ti Provincial Agriculture and Fishery Council nga idauluan ni PAFC Coordinator Lolita Arce kadagiti makinaria a nagun-od manipud   iti Departamento ti Agrikultura  kadagiti asosasion ti Rizal Farmers Association nga idauluan ni Kagawad Benigno Piros ken BACALL MPA nga idauluan ni Mr. Dominador Reynold Sabio ti Barangay Baclig.

Ti Monitoring Team ket immuna a naki-koordinarda ken ni Municipal  Agriculturist Zenaida S. Andrada sada napan iti ayan dagiti inspeksionenda a ramit-agrikultura: Reaper ti Rizal FA idinto ta Thresher  ti BACALL MPA.

Iti pannakiuman ti Web In-Action kadagiti Monitoring Team, imbatad ni Mr. Agapito Pablico, pangulo ti NGO’s ti Ilocos Sur ken pannakabagi kadaytoy a sektor  iti Regional Development Council (RDC), Region 1 a makapnek ti kasasaad dagiti makinaria a binisitada.  

Innayon pay  ni Mr. Pablico a kameng ti Monitoring Team: “I believe in the  balance development, transformative offices and magnifying performance of  leaders headed by the kind Mayor in helping  the farmers associations in the Municipality of Cabugao.” 

Kalpasan ti panagmonitor, napagsasanguan dagiti  nakipaset iti nasao nga aktibidad ti naisagana a pangaldaw  iti pagtaengan da Mr. Sabio iti Barangay Baclig, Cabugao, Ilocos Sur. # (Web In-Action)

GROCERY OWNERS, NAKI-DIALOG KEN NI MAYOR EDIBOY

Cabugao, Ilocos Sur (Agosto 30, 2012 ) – Naaramid ti dialog iti nagbaetan dagiti Grocery Owners iti Public Market (NISTC) ken ni Mayor Edgardo “Ediboy” S. Cobangbang, Jr. iti mismo nga Opisina ti Mayor iti Municipal Hall.

Pakaseknan daytoy ti espekulasion dagiti agtagikua ti pagtagilakuan a bumassit  ti paglakuanda no agoperar ti pasdek ti Grocery iti asideg ti Tiendaan ti ili a Cabugao.

Nupay kasta, inalay-ayan ti Ama ti Ili daytoy a pammati dagiti aglaklako. Nakitinnulong ni ABC President, Brgy. Captain Teddy U. Soller a nangilawlawag ti pannakaisakit  ti kasasaad  dagiti aglaklako iti tiendaan  kas  iti sumaganad:

• Adda 4 porsiento a mark-up ti presio ti Grocery   ditoy Cabugao. Ti 2 porsiento ket maidiskuento kadagiti taga-Cabugao a gumatang iti groseriada. Mairehistro ti amin nga agtagilako iti uneg ti tiendaan malaksid kadagiti sari-sari store  ket maikkanda ti ID a pakakitaan a mabenepisiaranda itoy a gannuat. 
• Mapalugodan latta dagiti grocery owners  a gumatang iti dumayo nga agideliber ngem masapul nga aglisensian  iti Munisipio ti naud-udi ken saandan a mapalubosan a mapan agideliber iti sukida  iti barangay tapno saan a maapektaran  dagiti aglako ti tiendaan.

Nupay kasta, nangidarirag ni Mayor Ediboy kadagiti kabaelan ti Munisipio a  pangalay-ay a tulong  para kadagiti grocery owners tapno saanda a maatiw iti benneg ti panagtagilakuan.

Dinakamat  ni Mayor Ediboy nga iti agtultuloy a programa ti LGU a  pannakatulong ken pannakapapigsa ti sektor-agrikultura iti biang dagiti mannalon  ken mangngalap ket agtultuloy met a mapapigsa ti “purchasing power” dagiti umili nga ad-adu nga adda kadaytoy a sektor. 

Iti kasta, ti pannakapapigsa ti kabaelan a gumatang ti amin a sektor ket  masustener ti sumaysayaat ken panagdur-as ti negosio gapu iti adu a  mapaglakuan ken mairaman met  a pumintas  ti ekonomia ti ili gapu iti pagrebbengan dagiti maseknan  a bayadanda.

Nakiraman a  naki-dialog dagiti adda dadakkel a puestoda iti tiendaan nga isuda  Mr. Roger Tajardon ken Mr. Billy Valderama. # (Web In-Action)

LIVELIHOOD PROJECTS TI STAC-PACI, NAKALIDAD

Cabugao, Ilocos Sur – Maysa a kangrunaan a pagkakitaan ita ti STAC-Parents Association of Cabugao, Inc., SEC Registered nga asosasion dagiti nagannak  dagiti ubbing nga adda an-annayenna ket iti newspaper weaving (mabukel a sukog-sabong), buri hat, ken plastic purse a nagansilio babaen ti recycled materials. Daytoy ti pakakumikomanda kabayatan a bantayanda dagiti ubbingda nga agad-adal iti STAC Center.

Iti pannakiuman ti Web In-Action idi Agosto 30, 2012, imbatad ni Miss Mercy Sol, Physical Therapist ti STAC, a natakuatanda daytoy a nasamay a  manglitup  kadagiti nagannak tapno adda kaipapanan ti bakante nga orasda iti pagadalan.

“Manayonan pay panagtalekda ti bagida ken mayaw-awanda ti dukotda kabayatan nga agur-urayda,” insupusop ni Mrs. Jocelyn B.  Tabboga, Special Education Teacher ti STAC.

Ti STAC-PACI ket idauluan ni Mr. Rusel Selma. # (Web In-Action)

MASTERLIST TI RIC-BRGY., PAADDAEN TI FEDERATED RIC

Cabugao, Ilocos Sur (Agosto 29, 2012) – Nagmiting ti Federated of Rural Improvement Club (RIC) iti intero a Cabugao nga idauluan ni Federated President Grenalyn Amoroso iti Municipal Conference Hall, Cabugao, Ilocos Sur.

Dagiti agenda a natratar ken napagnanamingan:

• Pannakaisubmiter ti listaan ti amin a miembro ti RIC iti kada barangay. 
• P30 ti pagbayad iti Saranay ti agmiembro: P10 ti death aid ken P20 ti mapan iti RIC Treasurer kas pundo para iti unipormeda ken dadduma pay.
• Masingir dagiti daan nga utang ti dati a  miembro.
• Agbayad ti Federated Membership Fee ti tunggal Barangay RIC.
• Mapasayaat ti amin a records iti RIC Barangay agingga iti Pederasion mangrugi iti Setiembre 2012 .

Dagiti agdama nga opisiales ti Cabugao Federated RIC ket isuda: Grenalyn Amoroso, President; Susan Cabasug, Vice Preseident; Milagros Belandres, Secretary; Aileen Sajor, Assistant Secretary; Jean Zabala, Treasurer; Ma. Francisca Sudaria, Auditor; Gloria Cobangbang, Tessie Savella, Ema Solmerin, Ednalyn Peralta, Delia Ramos ken Perlita Piros, PIO.  # (Web In-Action)

E-BEIS TI DEP-ED, MAOBLIGAR DAGITI EDUKADOR NGA AGTUNGPAL

Cabugao, Ilocos Sur – Naaramid ti meeting-workshop ti umabot ti 20 nga school heads ti Cabugao DepEd District nga idauluan ni Public Schools District Supervisor Helen V. Siruno idi Agosto 29, 2012 iti CSCS DepEd Conference Building, Brgy. Bonifacio, Cabugao, Ilocos Sur.

Tunggal Edukador ket naobligar a mangitugot ti Laptop nga usarenna iti workshop kas panagsagana iti pannakipasetda iti pannakaisubmiter ti Government Elementary Profile a ma-e-mail iti DepEd Website.

Imbatad ti District Supervisor a nupay maangay pay  ti pormal a panagsanay dagiti school heads, nasamay met a wagas no aktual metten a maisaganada  tapno maammuan  no adda usarenda ken maikkanda ti pamalpalatpatan  kadaytoy nasaknap a pannakaipakat ti computerized recording  and  data reporting system ti DepEd.

“Adda met dagiti School   Head  a nangikuyog ti kaduana ngem obligado daytoy a ti mismo a dadaulo ti eskuela ti agaramid ti report ket dayta ti pagkasapulan ita a masapul koma a  computer-skilled-ka nga Educator,” imbatad ti Superbisora idi kauman ti Web In-Action daytoy. 

Panggep pay ti panangukkon ken regular a panang-update  ti DepEd Higher  Office  ti solido a datos  ti kada distrito kas estratehia  ti panagplanoda iti proyekto ken pagdur-asan  ti  pagadalan iti intero a sektor-edukasion.

Segun ken ni Mrs. Julia Cayso, Principal ti Cuantacla Elementary School  ken nagbalin a Facilitator ti 1 day activity  ket naballigi daytoy a pakauna a meeting ken workshop dagiti Educators ti Cabugao DepEd District. # (Web In-Action)

FAMILY DEVELOPMENT SESSION, 4 P’S-BRGY. PUG-OS

Cabugao, Ilocos Sur – Naangay ti Family Development Session dagiti kameng ti Pantawid Pamilyang Pilipino Program (4 P’s) a nagkammayetan ti MSWDO ken RHU nga ipatungpal iti Barangay Pug-os, Cabugao, Ilocos Sur idi Agosto 28, 2012 iti Barangay Hall ti nasao a barangay.
Buklen dagiti pannakabagi ti LGU ti Nurses, Midwives ken Social Worker.

Iti bigat dayta a petsa ket naaramid ti panaglektiur dagiti pannakabagi ti dua nga opisina maipapan iti Responsible Parenting ken Family Planning. Nairagpin pay ti panangriknada kadagiti adda sagubanitna a kameng nangruna dagiti ubbing.

“Napintas daytoy a programa ti Munisipio kanyami ditoy ta mapalagipankami kadagiti annongenmi a nagannak ken umili. Agyamankami iti pannakaidanon ti serbisio kadakami,” imbatad ni Mrs. Marissa Vicente, ina a kameng ti Group 1 ti 4 P’s.

Batang met ti Group 2 ken 3 iti malem. Malaksid ti lektiur, tunggal kameng ket maayaban iti sango ket ibagana  ti kapanunotanna maipapan iti topiko a mawarwar.

“Epektibo ti session a pakaammuan  ti dadduma pay a pakaseknan a pakatulongan pay  kadakuada,” insupusop met ni Ms. Aida Cueto, Focal Person ti MSWDO.Kadua ni Ms. Cueto da Mrs. Gloria Sesuca, Ms.  Wilma Cruz, Ms. Lydia Gazmen, Ms. Kristal Mae Baclig ken Miss Neisel S. Sajonia  iti RHU. Naballigi daytoy a napasamak nga aktibidad  iti Barangay Pug-os. # (Web In-Action)

RELIEF DISTRIBUTION TI UPPAT A BARANGAY, NAISAYANGKAT

Cabugao, Ilocos Sur -  Naisayangkat ti Relief Distribution kadagiti barangay ti Daclapan, Quezon, Nagsincaoan ken Turod-Patac idi Agosto 27, 2012 babaen ti panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken dagiti pannakabagi ti Opisina ni Diputado Ryan Luis V. Singson,  First District, Ilocos Sur.

Segun ken ni Mrs. Leonora G. Reintar, OIC MSWD Officer, dagitoy a lugar a natulongan ket naapektaran iti panagdakkel ti danum a ginubuay ti Habagat nga impagteng ti bagyo.

Buklen ti bagas, sardinas, noodles, asukar, kape ken gatas  dagiti naiwaras iti relief operation. Dagiti bilang ti pamilia a naikkan ket  ti sumaganad: Daclapan – 83; Quezon-120; Nagsincaoan-44; ken Turod Patac-80.

Nakikaysa met  da ABC President, Brgy. Captain Teddy U. Soller,  SB Member Benedict M. Savellano ken dati a Provincial SK Federation President DJ Savellano iti nasao a  panagmonitor ken panagtulong ti nadidigraan.

Ti Relief  Distribution ket ka-koordinarna ti Municipal Disaster  Risk Reduction Management Council (MDRRMC)  nga idauluan da Engr. Crescencio C. Formoso, Municipal  Engineer  ken Engr. Nestor Somera, Waterworks Superintendent nga   agmonmonitor  a kaduada  dagiti kamengna no tiempo ti kalamidad. # (Web In-Action)

ITI RHU, SIGUDENDA TAPNO DI AGKARO TI SAKIT

Cabugao, Ilocos Sur – Nairuamen dagiti umili a mapan agparikna no adda sagubanitda: ubbing, agtutubo, nataengan a kuyogen ti patpatgenda ti biag ken  nangruna a kaadu ti   mataming a pasiente iti aldaw ti Lunes wenno damo nga aldaw ti lawas a panag-opisinada iti RHU.

Iti pannaki-amad ti Web In-Action iti Admission and Information Desk  ti RHU-Cabugao, kaaduan a naaramid ket  nagpa-check up  ita nga Agosto 28, 2012 ket uyek ken panateng ti kaaduan a rikriknaen dagiti pasiente.

Imbatad ti Admitting Attendant  nga adda met sumagmano a nadagsen ti sakitna nga agpaagas kas iti maobserbaran no  agsarut ket maalaanda a dagus  ti plemas    ken dadduma pay a sakit ti uneg a maipaamiris  iti laboratorio. Maaramid ti laboratory test iti tunggal bigat ti Miyerkoles babaen ken ni Ms. Florentina Savella, Medical Technologist.

Ti pannakasigud dagiti rumsua a sakit ket paset ti  aksion- serbisio  iti naiprayoridad a programa ti Gobierno Munisipal nga idauluan  ni Mayor Edgardo “Ediboy” S. Cobangbang, Jr. a mangtagiben nga agtultuloy  ti salun-at ti sapasap tapno agbiag dagiti umili  a naragsak ken nasalun-at. # (Web In-Action)

FIRST BATCH TI TREE PLANTING, NABALLIGI

Cabugao, Ilocos Sur – Naisayangkat  ti Tree Planting Activity  iti Magarang Spring and  Watershed Area idi Agosto 25, 2012 a nagpartisiparan ti nadumaduma a Opisina  ken Ahensia. Indauluan  ni Mayor Edgardo “Ediboy” S. Cobangbang, Jr. ti inter-agency  a  panagmula ti kayo iti dayta nga agsapa kas tanda iti naregget ken agtultuloy a pannakaipamaysa  daytoy a programa  tapno masaluadan ti aglawlaw.

Nasapa a nagturong dagiti grupo iti Brgy. Cacadiran ket ditoy ti nangalaanda ti imulada ken nangibatianda kadagiti naglugananda sada nagnagna a simmang-at iti akikid a desdes nga agngudo iti  pamurosan ti danum iti Waterworks System ti  Cabugao.

Kalpasan a maimulada ti iggemda  a seedlings, bimmabada ket  nagsublida iti nakai-parkingan dagiti luganda iti Kubo ti Konseho ti Barangay a naginanaanda  ken iti  sentro  ti Sitio Rebba, Brgy. Cacadiran.

Dagiti sumaganad ti Opisina ken Ahensia  a nag-batang iti First Batch: Mayor’s Office, HRMO, PNP, Agriculture Office, Engineering Office, General Services Office, Budget Office, Accounting Office, Job Order.

Nakipartisipar met dagiti Opisiales ti Barangay iti umuna nga eskediul, Farmer’s Association ken dadduma pay nga organisasion kadagiti barangay ti Cacadiran, Lipit, Cuancabal, Sagayaden, Rizal, Bonifacio, Turod ken Turod-Patac.

Nakiraman met itoy nga inter-agency  tree planting  dagiti mangisursuro ken estudiante  ti Cabugao National High School, Cabugao Institute, Cabugao DepEd, ken Parish  Pastoral Council.

Daytoy a gannuat ket paset ti panangidur-as ti sapasap iti  programa ti Gobierno Nasional a “Greening Program”  ken para iti conservation ken proteksion ti watershed area partikular ti Magarang Spring a kadakkelan a  pagtaudan ti kasapulan a danum  dagiti umili ti Cabugao.

Nakipagtarabay dagiti dadaulo ti opisina ti LGU, Kakapitanes babaen ti panangidaulo ni ABC President, Brgy. Captain Teddy U. Soller, dadaulo ti pageskuelaan ti sekundaria, NGO’s a tinarabay ni MAFC Chairman  Rogelio Barlolong.

Nakipartisipar met ti grupo ni Dati a Provincial SK Federation President DJ Savellano iti nasao a panagmula ti kayo. # (Web In-Action)