EVALUATORS TI NUTRISION, NAGINTEKDA ITI BRGY. BONIFACIO

Cabugao, Ilocos Sur – Simmangbay dagiti National Evaluators ti National Nutrition Council nga idauluan ni Health Assistant  Secretary Maria Bernardita T.  Flores, CESO II ket nakikammayetda iti LGU nga idauluan   ni Mayor Edgardo S. Cobangbang, Jr. pakaseknan ti aramidenda  nga ebaluasion kas paset ti eskediul ken itineraria-da. Kangrunaan a pagdamaganda   iti nominado ti Region 1 iti Most Outstanding Barangay Nutrition Scholar of the Philippines, Ms. Macrina Irorita Saturno a taga-Brgy. Bonifacio, Cabugao, Ilocos Sur idi Agosto 22, 2012.

Kalpasan ti naaramid a  panagsasarita  iti Opisina ti Mayor, nagturong ti grupo ti evaluators iti Barangay Hall Compound  ti Brgy. Bonifacio. Binayabay ni DA Assistant Provincial Agriculturist Editha Castillo ti grupo ni ASec. Flores. Naragsak met a sinabat dagiti Opisiales ti Barangay nga idauluan ni Brgy. Captain Valentin S. Tuyor, Jr. ken ti  grupo ti ubbing  kadagiti dimteng a bisita.
Di mabayag, naiwayat ti one-on-one interview dagiti evaluators iti Nominee, Opisiales ti Barangay ken Barangay Health Workers (BHW’s) kasta met nga inistudiarda dagiti rekords a pakapaneknekan dagiti naisungbat ni Ms. Saturno. 

Kamalmanna, naaramid ti aktual a  panagtimbang  dagiti ubbing ti barangay (random) manipud iti listaan  ket nakipaset ni Asec.  Flores a nagdamdamag ken nangimatang ti aktibidad. Nakipagtaming  pay ni Ms. Widna E. Galuardo, Federated BNS President ti Ilocos Sur itoy nga aktibidad kasta met ni MNAO Joenah G. Sevilleja.

Iti Agosto 23, 2012,  nagturong dagiti  evaluators kadagiti proyekto  ti barangay kanaig iti programa ti Nutrision  kas iti Herbary, Material Recovery Facility (MRF), Vegetable Garden, Nursery,  Garbage Disposal, ken Segregation Boxes (Nabubulok at-Di Nabubulok). Naited pay  ti written examination ken ni Ms. Saturno babaen kadagiti evaluators.

Imbatad   ni Mrs. Macrina I. Saturno a determinado  a nagsungbat kadagiti  detalyado a  datos a kinasapulan dagiti evaluators  maibasar iti  indicators  iti salip.

Segun iti pannakabagi ti grupo ni Asec. Flores, walo a rehion ti pagilian ti agsasalip itoy a benneg ket manamnama a maammuan ti resultana iti nasapa a paset ti bulan ti  Setiembre 2012. # (Web In-Action)