Cabugao, Ilocos Sur – Naaramid ti miting ti Federated Farmers Association ti ili a Cabugao babaen ti panag-Preside ni Mr. Elmer Guerrero Bromeo, Federated President ita nga Agosto 7, 2012 iti Municipal Conference Hall.
Nakipaset ni Mayor Edgardo “Ediboy” S. Cobangbang, Jr. gapu ta dakkel ti akem ti Ehekutibo ti pannakaaprobar dagiti financial assistance a kidkiddawen dagiti asosasion ti mannalon a kas kangrunaan nga agendum-da iti panagmitingda.
Impaawat ni Mayor Ediboy a magunggonaan dagiti immuna a 1st Thirteen nga asosasion ta naisublida iti Munisipio ti immuna a P23,000 a nabulodda ken sinublatda met laeng itay nabiit. Manayonan manen ti P12,000 ti nabulod dagitoy ket agkairton a P35,000 ti nautang ti tunggal asosasion. Kalikaguman ti Mayor a mapadakkel ti indibidual nga organisasion kas iti inaramid ti umuna a 13 nga asosasion ti binulodda a kantidad.
Innayon ti Alkalde a mayalokaran iti Konseho Munisipal ti sag-P20,000 met dagiti nabatbati a 22 nga asosasion a damona ti bumulod ket ingunamgunamna nga ipategda/protektaranda ti asosasionda,probitsarenda ti karbenganda ken usarenda iti sapasap a pagsayaatan ti kamkameng daytoy a mabulodda.
Iti sabali a bangir, manamnama pay a mairaman a maikkan ti financial aid dagiti 4-H Club a maipampamaysa a mapatibker kasta met ti Fisheries Sector segun iti Ama ti Ili.
Naisaruno a napagsasaritaan ti pakaseknan dagiti mannalon kas iti sumaganad:
- Panangdaw-as ditoy Munisipio dagiti saan pay a nakaala iti oil ken fertilizer subsidy-da.
- Naimiting ti dadduma pay a pagsayaatan nga itden ti kooperatiba babaen kada Provincial Cooperative Officer Pilorin ken ni NGO Federated President Agapito Pablico.
- Natratar dagiti dadduma pay a pakaseknan iti indibidual nga asosasion ken ti pakabuklan ti Pederasion.
Nagatendar met da Municipal Agriculturist Zenaida S. Andrada, Municipal 4-H Club Coordinator Joenah G. Sevilleja, MAFC Chairman Rogelio Barlolong, ken ABC President, Brgy. Captain Teddy U. Soller iti nasao a miting. # (Web In-Action)
No comments:
Post a Comment