Cabugao, Ilocos Sur - Nainstolar ti Outdoor and Pool Playground iti Cabugao Central Park (CCP), Brgy. Bonifacio, Cabugao, Ilocos Sur idi Agosto 16, 2012 a no sadino a ditoy ket inarak dagiti ubbing ken umili a mangkita/nangisibro kadagitoy a pagay-ayaman ti ubbing kas iti slide, rocker, swing, ken seesaw.
Daytoy a pagay-ayaman ket indonar ti Cabugao Organization of Southern California (COSCA) iti panangilungalong ni Atty. Romeo Sajor, Opisial ti nasao nga organisasion. Ti Gobierno Munisipal ti ili a Cabugao nga idauluan ni Mayor Edgardo “Ediboy” S. Cobangbang, Jr. ti mangtarawidwid kadaytoy a pasilidad ti pagay-ayaman ket maipaay para iti sapasap nga umili ti Cabugao.
Iti pannakiuman ti Web In-Action iti kaaduan a nagannak a mangkadkadua ti annakda nga agay-ayam, impeksada ti panagyamanda kadagiti naayat ti panagpuspusona a kakailian a nangidonar kadagitoy a pagay-ayaman kasta met iti Gobierno Munisipal a nakaitalkan daytoy a proyektoda.
Maysa a talged dagiti agay-ayam nga ubbing ket ti rubber mat a nayaplag iti semento a mangagsep ti pannakaisan-ek dagiti agay-ayam, segun kadagiti naginstolar.
Agsipud ta maisalumina ti klasena a paglinglingayan daytoy kadagiti ubbing a mapan iti Parke, di magatadan ti ragsak a gubuayenna iti rikna dagiti ubbing kadaytoy a naiyusuat a recreational facility.
Nupay kasta, imbatad ni Mr. Gerry Sevilleja, Park Warden, a kitaenda a kanayon nga ubbing laeng ti agusar (10 ti tawenna nga agpababa), ken mamantener ti urnos ken kinasayaat ti panagay-ayam dagiti ubbing. # (Web In-Action)
No comments:
Post a Comment