NARAGSAK TI KAALDAWAN TI KASANGAY NI MAYOR EDIBOY

Cabugao, Ilocos Sur – Naselebraran ti petsa ti  pannakayanak ni Mayor Edgardo “Ediboy” Salamanca Cobangbang, Jr. idi Agosto 18, 2012 (Sabado) iti mismo a pagtaenganda iti Brgy. Bonifacio, Cabugao, Ilocos Sur.

Nakipagselebrar ti Pamilia-LGU Cabugao, DepEd,  Opisiales ti Barangay,   nadumaduma a  sektor  iti Munisipalidad ken    iti barangay. Naruay  a kailian ti nasapsapa a dimteng iti dayta nga aldaw  ket nagdudupudop ti maki-kasangay  a simmangpet  iti umal-aldaw.

Nabara ti panangsarabo   ni Mayor Ediboy kadagiti dimmar-ay  ken nagyaman kadagiti kailianna ken bisitana  a sigagagar a makiinnabrasa  ken mangkablaaw kenkuana.

Indauluan ni Mrs. Lucille S.  Somera iti ababa a kararag a naidaton sakbay  ti pannakalak-am  dagiti naidasar  a  taraon a kanaig ti panagrambak.

Nakikaysa met iti selebrasion da  Diputado Ryan Luis V. Singson ken dati  a Provincial SK Federation President DJ Savellano. 

Naruay met dagiti naited a pangkasangay a sagut  ket siraragsak ti Ama ti Ili ken ti Pamiliana a nangawat kadagitoy a tanda  ti ayat ken pammateg kenkuana iti kaaldawan ti pannakayanakna.

Manamnama pay ti  dumteng  a  sangaili, gagayyem, am-ammo, ken kabagyan  a  makipagrambak ti selebrasion ti panagkasangay ti Alkalde Munisipal ti Cabugao. 

Ni Mayor Ediboy ket inauna nga anak da Brgy. Captain Edgardo Savellano Cobangbang, Sr. ti Brgy. Sabang  ken dati a  Ms.  Herminia Belen Salamanca.  # (Web In-Action)