AGITED PAY LAENG TI NGO TI SEEDLINGS A MAIMULA

Cabugao, Ilocos Sur – Kinauman ti Web In-Action da Mr. Gil M. de la Cruz, Field Coordinator ti Tanim Kalikasan, Inc.,  NGO a maseknan iti pannakasaluad ti aglawlaw kasta met  ni Mr. Edgar S. Balangatan, MENRO-Designate iti LGU Cabugao  ket intudingda nga agtultuloy a  kabinnuligda  dagiti panakabagi ti LGU, nadumaduma a sektor, ahensia, opisina  ken barangay iti agdama   a mangipatungpal kadagiti  plano ken programa  iti Greening Program partikular  iti Reforestation Activities agingga inton 2013.

Imbatad ti NGO Coordinator nga umaboten   ti 50,000 a seedlings ti naiwarasda   iti nadumaduma a disso a nagpamulaanda kas iti G-melina ken  Mahogany. Kasta met iti endemic species a kas iti Narra, Bittaog, Tuai, Kalumpit, Dau, Kopa ken Molave (sagat) iti ili ti Cabugao.

Malaksid iti 5,000 a kiniddaw ti LGU babaen ken ni MENRO Designate Edgar S. Balangatan a maimula iti reforestation activities kadagiti watershed area a kas iti Roma, Kinalian ken Magarang, adda pay 8,000 (G-melina ken Mahogany) a naka-stand by   a naisangrat a para iti indibidual nga agkalikagum a makipagmula. 

Innayon ti Field Coordinator nga ipatpatungpal ti grupoda ti pannakaasistir  dagiti nakaeskediul nga agmula, agideliber-da  ti maimula ken monitorenda no maestimar met laeng dagiti naited/naimula  a seedlings.

Impasingked met ni MENRO Balangatan a katulonganna dagiti opisiales ti barangay nga agmonitor kadagiti naimula a seedlings iti masakupan ti Munisipalidad ti Cabugao. Inulitna nga iti 80,000 a naimula itay 2011 ket adda ti 79% a nagbiag kas inayonan ni Field Coordinator  Gil M. de la Cruz maibasar iti Actual Asssesment-da. 

Iti sabali a bangir, imbatad ni Municipal Agriculturist Zenaida S. Andrada a saan met a nagpaudi ti Municipal Nursery nga imatonan ni Mr. Robert S. Savella a nagited ti seedlings (mahogany, fruit trees kas iti salamagi, atis, ken  anangka)  kadagiti nagkiddaw ti maimulana ita a panagtutudo. Daytoy ti kangrunaan a panggep ti Municipal Nursery a mangpaadda kadagiti  maimula a seedlings tapno tumulong a mangidur-as ti Greening Program iti biang ti Munisipio. # (Web In-Action)