Cabugao, Ilocos Sur – Indauluan ni Brgy. Captain Ronel Zamora dagiti mangngalap a nakimiting kadagiti pannakabagi ti DA-LGU tapno mareorganisar ti sektor-mangngalap ditoy a barangay idi Agosto 10, 2012 iti Multipurpose Building, Brgy. Salapasap, Cabugao, Ilocos Sur.Impasagepsep ni Mrs. Ester Aguimbag, Municipal NGO’s Coordinator ti panggep ti pannakabiag ti asosasion ken pannakairamanda kadagiti programa ken proyekto ti Gobierno Munisipal ken Ahensia kas iti DA ken DOLE a pakabenepisiaranda a sapasap nga asosasion.
Timmulong met ni Mr. Robert S. Savella, DA-LGU Technologist a nangorganisar kadagiti mangngalap. Napagnanamingan dagiti kangrunaan a maaramid a kas iti pannakapabaro ti Paglintegan, mapagtutulagan dagiti mabayadan iti rehistrasion ken indibidual a panagmiembro ken dues.
Daytoy a gannuat ket mayataday iti lungalong ti Gobierno Munisipal a pannakaibagnos dagiti saan pay a naorganisar a sektor nangruna ti mangngalap tapno saanda met a maikapis kadagiti programa ken proyekto a naprobitsar dagiti padada nga asosasion kadagiti Ahensia ti Gobierno ken ti LGU.
Dagiti napili nga opisiales ket isuda: Ronald Villanueva, Presidente; Jodel Barcellano, Bise Presidente; Victorino Solmerin, Sekretario; Glenford Villanueva, Auditor; Daniel Solima, PIO. # (Web In-Action)
No comments:
Post a Comment