FARMER’s FIELD SCHOOL (FFS), MAAR-ARAMID ITI BRGY. TUROD

Cabugao, Ilocos Sur – Naigannuat ti Farmer’s Field School on Sustainable Rice Production Project kadagiti mannalon ti Barangay Turod  babaen iti panagbinnulig ti Department of Agriculture, Regional Field Office (DA-RFO 1), San Fernando City, La Union ken ti Local Government Unit (LGU)-Cabugao, Ilocos Sur iti panangidaulo ni Mayor Edgardo “Ediboy” S. Cobangbang, Jr.

Segun ken ni Acting Municipal Agriculturist Robert S. Savella, dagiti sumaganad ti panggep daytoy a programa ket intultuloyda idi Hulio 6, 2015:

1. Pananggun-od ti kabaelan iti panagpatanor ti pagay babaen iti aktual a kapadasan manipud iti panagbunubon agingga iti panagapit. 

2. Panangadal ti amin nga aspeto iti panagtan-ay ti pagay tapno umadu ti maapit.

3. Panangbaliw ti kadaanan a wagas ti panagmula ti pagay ket aramiden ti kabaruanan a takuat a mangingato ti matgedan.

4. Mangipasigurado ti 15% a ngatuan ti apit kada panagtalon ken 5% ti tinawen.

5. Panangpapigsa ti gimong ti mannalon ken panangnayon ti kabaelanda nga agmanehar iti naimulada a pagay.

Dagiti kangrunaan a pagsentruan   ti maisuro ket iti:  1.   Agro-Ecosystem  Analysis  (AESA) 2. Palay Check Session 3. Group Dynamics 4. Panangtaming iti aktual a maduktalan iti panagadal.

Innayon pay  ni Mr. Savella dagiti FFS Guide a pagbasaranda dagiti aktibidadda a sumaruno kas iti sumaganad:

1. Field Tour – Random Survey of Missing Hills (per treatment); Survey Data Processing; Group Reporting (Average Number of Missing hills per Treatment) Group 1-5; Big Group decision: Replant Missing hills.

2. Palay Check session: Key Check 5, Nutrient Management, Key Check 6, Water management.

3. Special Topics: AESA - Agro Eco System Analysis Principles and Concepts ken Output Processing and Presentation. 

Dagitoy ti pakabuklan ti  adalenda  iti FFS Sessionda iti kada lawas. Buklen ti panagadalda iti 16 a lawas manipud iti panagbunubonda.

Iti biang ni Acting Municipal Agriculturist Robert Savella ti DA-LGU, pinaregtana dagiti mannalon ti Barangay Turod   nga ikagumaanan dagiti recipients nga adalen ti maited a baro a teknolohia ti panagtalon ket iyallatiwdanto iti padada nga agtaltalon para iti sapasap a pagririnnanudan.

Pinagyamanan  pay ni Mr. Savella  ti  Gobierno Munisipal nga idauluan ni Mayor Edgardo “Ediboy” S. Cobangbang, Jr.  ken ti DA-RFO 1 nga idauluan ni Regional Executive Director   Valentin C. Perdido, Ph. D.,  ta maikkanda iti kastoy nga adal a mangiyintek iti napintas a pagbanagan iti mulada a pagay.

Malaksid kadagiti kabaruanan a teknolohia a masagsagrap ti Turod FA, karamanda pay kadagiti asosasion ti mannalon iti programa ti LGU-Cabugao a nakagun-od iti ramit ken makinaria iti panagtalon para kadagiti Asosasion. # (Web In-Action)