Monday, July 27, 2015

PINADAYAWAN NI MAYOR EDIBOY DAGITI BARO A POLIS KEN EMPLEADO

Cabugao, Ilocos Sur – Kalpasan ti Flag Ceremony iti Hulio  27, 2015, pinadayawan ni Mayor Edgardo “Ediboy” S. Cobangbang, Jr. babaen iti panangbigbigna ti kinatunos dagiti kameng ti Pamilia-LGU ken kasta met kadagiti Opisiales ti Gobierno Lokal ti ili a katintinnarabayna a mangipapaay ti serbisio kadagiti umili ti Cabugao, Ilocos Sur.

Pinadayawan met ni Mayor Ediboy dagiti tallo a baro a kameng ti Municipal Police Station (MPS)-Cabugao nga isuda Deputy Chief of Police Neil Olsim; PO2 Alex Quiday ken ni SPOP2 Inigo ken maysa a kabarbaro a regular nga empleado ti LGU-Cabugao nga isu ni Mr. Fredelito Aquino. Naikkanda ti gundaway a nagsarita dagitoy a nadakamat a polis ken empleado iti sanguanan ti Pamilia-LGU ken dagiti kameng ti Konseho Munisipal a nakaimatang.

Dinakamat ti Ama ti Ili iti naileppasen a baro a pasdek ti Police Station idiay asideg ti tiendaan ket inulitna manen nga imbaga a maipatakderan met  ti sub-station iti nagbaetan ti sango ti simbaan ken ti munisipio kasta metten iti sumrekan iti Sitio Cabaruan, Brgy. Cuancabal tapno estratehiko a mawidawidan dagiti pannakabagi ti linteg ti linak ken talna ti ili.

Naragsakan pay ti Ama ti Ili a nangipadamag iti kaadda ti baro a police patrol jeep ken kanayonna ti baro a motorsiklo a masapulda iti panagpatruliada dagiti polis.

Kanaig daytoy, inggunamgunamna  met ti agtultuloy a koordinasion ti MDRRMC kadagiti BDRRMC kadagiti barangay tapno ipalagipda iti nasiken a pannakaaywan dagiti aktibidades dagiti ubbing ken agtutubo tapno di maipada kadagiti maipadpadamag nga insidente dagiti malmalmes kadagiti sabali a luglugar. Pinakdaaran pay ti Municipal Chief Executive dagiti sumsumrek nga ambulant vendors a saanda nga agoperar ditoy ili nangruna no saanda  a nakarehistro iti munisipio. Naiputanan  daytoy a pakaseknan iti food safety iti kaaduan tapno maliklikan dagiti saan a nasayaat a mapaspasamak kas iti sabsabali a lugar.
Naragsak pay ti Ama ti Ili a nangipadamag iti napintas a n agapuanan ti Pamilia-LGU iti napalabas a makalawas ken mangnamnama latta nga agtalinaed ken manayonan pay ti napipintas a magapuanan kadaytoy madama a  lawas ti bulan. # (Web In-Action)

No comments:

Post a Comment