Cabugao, Ilocos Sur – Naipagagangayen a maus-usar ti inted ti LGU-Cabugao nga espasio para iti “Bagsakan ti Nateng” iti igid ti Kalsada Nasional iti asideg ti NISTC Public Market, Cabugao, Ilocos Sur babaen kadagiti aglaklako/aggatgatang ti nateng iti lokalidad.
Iti pannakiuman ti Web In-Action, kinuna dagiti dati nga agipalpalugan ti nateng a nag-lie low-da pay laeng nga agipatulod idiay Manila ken Pangasinan ta by-volume ti gatangenda ket bay-anda pay laeng a maipokus ti suplay iti Tiendaan ti ili tapno saan a ngumina unay ti presio ti nateng no bumassit ti magatang.
Sakbayna, nangrugi a kapigsa ti panaglakoda iti bulan ti Nobiembre agingga iti bulan ti Pebrero iti panagipatulodda iti nateng a maangkat ken mailako idiay Urdaneta, Pangasinan, Balintawak, Quezon City ken Divisoria, Quiapo, Manila kasta pay a masuplayanda pay ti tagilakoda a nateng iti nadumaduma nga ili ti Cagayan. Agpatingga met iti bulan ti Mayo iti panagbassit ti bulto ti mailakoda a nateng.
Maibasar iti gapuanan ti Cabugao Vegetable Growers and Producers Association ket umab-abot ti 10 Tonelada ti bulto iti nateng a naibiahe a mairuar nga aggapu iti ili iti unos ti 24 oras ti kada aldaw idi kapigsana.
Nupay bimmassit ti suplay iti bulan ti Hunio ken Hulio, saan ketdi nga agsardeng ti panagnegosioda ti nateng nangruna iti tiendaan ta adu latta ti nagaget nga agmulmula nangruna iti Sitio Bugnay ken Barangay Salapasap a mabirbirngasan iti “Vegetable Bowl” ti ili a Cabugao.# (Web In-Action)
No comments:
Post a Comment