Cabugao, Ilocos Sur – Agdama itan a pakairanranudan dagiti PWD’s Members ti 55 a Kalding a naited kadagiti Benepisiario iti Proyekto a “Goat Production and Management” ti Federation of Persons with Disability-Cabugao nga idauluan ni Mr. Dante Ullero, Federation President. Naited dagitoy a mataraken a dinguen idi Pebrero 25, 2014.
Ti nasao a proyekto ket nagbuligan nga impaay ti Department of Labor and Employment (DOLE)-Vigan City babaen iti panangirepresentar ni Mrs. Charity A. Ubilas, DOLE-ISFO ken iti LGU-Cabugao nga idauluan ni Mayor Edgardo “Ediboy” S. Cobangbang, Jr.
Iti pannakiuman ti Web In-Action, impeksa ni Mr. Dante Ullero agraman dagiti kakaduana a Recipients iti nalaus a panagyamanda iti LGU-Cabugao nga idauluan ni Mayor Ediboy kasta met kadagiti Opisiales ti DOLE-Vigan City ta agtultuloy a maikkanda iti pateg ken tulong tapno naan-anay iti panangpasayaatda iti kasasaadda a PWD’s.
Innayonna a nanayonan ti panagtalekda iti bagida ken maysa pay in-inut a mapaaduda ket no adda mainayon nga agtarigagay nga agtaraken ket maikkan ti aywananna a kalding tapno sapasapda la ket ngaruden a mabenepisiaran kadaytoy a naited a proyekto.
Nasurok a makatawenen ti napalabas iti nadakamat a proyekto ket segun ken ni Mr. Dante Ullero ket napintas ti nagbanagan iti panggep ti nasao a proyekto a para kadakuada iti agdama. # (Web In-Action)
No comments:
Post a Comment