Cabugao, Ilocos Sur – Maar-aramid ti panagsanay dagiti mannalon a pannakabagi ti ili a Cabugao, Sinait, San Juan, Magsingal; ken Sto. Domingo iti Hulio 15-16, 2015 iti Municipal Conference Building, Cabugao, Ilocos Sur.
Ti panagsanay ket pagbuligan ti LGU-Cabugao nga idauluan ni Mayor Edgardo “Ediboy” S. Cobangbang, Jr., Opisiales ti Ilocos Sur Polytechnic State College (ISPSC)-Sta Maria ken ti Gobierno Probinsial ti Ilocos Sur nga idauluan ni Vice Governor Deogracias Victor B. Savellano ken ti DTI-Vigan City.
Iti Day 1, Hulio 15, 2015, sakbay a narugian ti seminar, naangay ti Opening Program. Inyam-ammo ni Miss Edith Castillo, Consultant dagiti partisipantes.
Panglukat a sarita ti binagi ni SBM Benedicto M. Savellano, Committee Chair on Agriculture, Fisheries and Cooperatives. Bininsana ti pateg ti panangipokus ti LGU-Cabugao nangruna iti Komite nga idauluanna iti Konseho Munisipal iti pannakatulong ti sektor agrikultura agsipud ta daytoy ti mayoria a benneg ti umili. Dinakamatna dagiti ahensia a nakikammayetan ti munisipio nga agtultuloy a mangipapaay iti adu a ramit ken proyekto ket kangrunaan ditoy ti Soil Fertility Mapping Project nga inted ti BSWM a katulongan dagiti mannalon nga agpatanor itattan iti mulada.
Nagsarita ni Mayor Edgardo “Ediboy” S. Cobangbang, Jr. Kimmablaaw ken nagyaman ti Ama ti Ili kadagiti bisita iti ISPSC, DTI ken pannakabagi ti lima nga ili (Cabugao, Sinait, San Juan, Magsingal ken Sto. Domingo) nga agadal iti panagpatanoran ti mani ken kardis (Groundnut ken Pigeon Pea) a proyekto ita ti Provincial Government babaen iti panangtarabay ni Vice Gov. DV Savellano.
Innayonna a napateg a maikkan ti intervention dagiti mannalon nagruna ita ta maipatpatungpalen ti implementasion ti soil fertility mapping kadagiti barangay ditoy nga ili.
Innayon ti Chief Executive a maipampamaysa a mataming iti pagsayaatan dagiti mannalon tapno ngumato ti matgedanda ket no mapapintas ti kasasaadda ket isublida met laeng a progreso ti ili ta pumigsa ti “purchasing power-da” a gumatang ti tagilako a pangalaan ti Taripa ti LGU nga agsubli para iti umili babaen porma iti serbisio.
Dinakamat ti Ama ti Ili ti panagmaymaysa ti rikna dagiti mangibagbagi kadagitoy nga ili nga agbinnadang ken mangaramid ti sirmata a no agballigi daytoy a gannuat ket awanto ti papananna no dinto iti panagsayaat ti tunggal maysa – adda mainayon a a pamastrekan dagiti mannalon babaen iti panagpatanor ti mani ken kardis.
Inestoriana ti panagbisitada idiay pagilian ti India a nangipakitaan ti ICRISAT dagiti proyekto a posible a maadaptar ditoy ili ken probinsia.
Insupusop ti Municipal Chief Executive a probetsarenda koma ti serbisio nga itden dagitoy nga ahensia ket madadaanda koma a mangsabat ti programa ta uray bassit pay laeng ti pangrugianda ket awan ti papananna a dinto dumakkel ket mapatan-aydanto ti “collective bargaining” tapno makomplementaran dagiti mangpasayaat pay iti programa.
Indagadag ni Mayor Ediboy nga idanon dagiti partisipantes dagiti maadal/mabukel a plano para kadaytoy a proyekto kadagiti dadauloda ti ili tapno sangsangkaturong ti direksion ti panagballigi daytoy a gannuat.
Simmaruno a nagsarita ni Vice Governor DV Savellano. Dinakamatna ti dakkel a potensial dagitoy a produkto a mapatan-ay iti lima nga ili ken iti intero a probinsia ket maaramid pay dagiti seminar ken panagsanay nga umuna yantangay adda dita dagiti sientista ken ti ICRISAT nga internationally funded a kumibin iti proyekto ken bumadang met ti DTI maipapan iti ramit iti pagaramidanto ti arina a kangrunaan a by-product dagitoy.
Binigbigna met ti padasda a nagbisita idiay India a mabalin a mapasamak met ditoy probinsia a mangnayon pay iti pagkakitaan dagiti mannalon.
Nagsarita met ni Dr. Remely A. Sanidad ti ISPSC a nangibagi ken ni Dr. Rafael B. Querubin, SUC President II, ISPSC ket binagi ni Mr. Armando D. Diga, Faculty Researcher ti ISPSC iti Overview & Levelling of Expectations sakbay a nairugi ti Training Proper iti kamalman iti dayta a petsa. # (Web In-Action)
No comments:
Post a Comment