Cabugao, Ilocos Sur – Iti pannaki-amad ti Web In-Action idi Hulio 1, 2015, agtultuloy nga asikasuen ni Mr. Nathaniel Galamgam, Municipal Organic Production Focal Person, iti paanakaadaptar/pannakapaadu ti “African Night Crawler” nga alinta a pupokda kadagiti Vermicompost Bin iti Brgy. Baclig ken Barangay Turod Patac, Cabugao, Ilocos Sur a disso dagiti nakaitedan ti pamuonan nga alinta. 
Innayon ni Mr. Galamgam a kasapulan koma a regular ti panag-harvestda iti naurnong a lugit dagiti alinta tapno masuplayan dagiti aggatang a mannalon/indibidual iti produksionda (takki ti alinta) tapno maparegtada a mangtuladken tapno adda usarenda a pagabuno iti pagtatalonan ken pagnatenganda.
Ti Vermiculture/Vermicomposting Project ti DA-LGU ket panggepna a patuladan/tignayen ken ipakita iti epekto ti organiko a ganagan iti mula a pagay ken nateng ken kas pangannurot iti sinaguday ti Akta Republika 10068 (Organic Agriculture Act 2010) a linteg a mangipatungpal iti Organic Agriculture ket agbalin a kapartner ti DA iti LGU iti implementasion ti nadakamat a linteg.
Iti agdama, ti nadakamat a Vermicompost Production ti DA-LGU ket agpapaay a modelo ket imatmatonan met ni Mr. Obas Bill Y. Baclig, Municipal Organic Production Coordinator ti Vermicompost/Vermiculture Bin iti Municipal Plant and Nursery a mangkomplementar iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangitandudo iti Organic Agriculture iti Sektor dagiti mannalon iti Cabugao, Ilocos Sur. # (Web In-Action)
No comments:
Post a Comment