Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon ti tudo iti kangrunaan a pagbatayanda iti panangpalawada ti matalonda iti Wet Season 2015 (Hunio-Nobiembre). Naammuan pay a kaaduan ita iti manam-ayan iti kaadda ti naited kadakuada a libre a bukel ti Ryan Rice ken Organic Fertilizer iti dadduma a mannalon babaen iti programa ti Gobierno Munisipal ken ti DA-RFO 1 a mausar iti panagbunubonda ken an-anayanda metten a mausar iti panagpadakkeldanto iti mairaepda.
Maibasar iti tignay ken serbisio ti DA-LGU maipapan iti daytoy a panagtatalon, imbatad ni Municipal Rice Program Coordinator Nereo S. Daproza a kaaduanen iti umabot ti 4,600 a bilang ti mannalon a mangbukel kadagiti 35 a rehistrado nga asosasion ti mannalon iti naikkan ti pamalpalatpatan iti Cropping Calendar & Pattern of Planting iti Wet Season 2015 babaen iti naaramid a meeting ken Technical Briefing ti Palay Check Session iti kada barangay/asosasion.
Nupay kasta, kaaduan a mannalon ti agpannuray iti buslon ti tudo iti eskediul ti panagtalonda kadagiti 1, 283 ektaria a rainfed area ken naituding met dagiti eskediul-da kadagiti masakupan ti irigasion nga umabot ti 971 ektaria a mataltalon.
Innayon ni Mr. Daproza a manamnama a matalon ita ti ag-2,204 ektaria a dati a mataltalon iti intero a Munisipalidad. Kanaig daytoy, nailunsaden dagiti Municipal Techno-Demo Farms kadagiti estratehiko a lugar kasta metten ti Farmer’s Field School (FFS) in Rice Production sadiay Brgy. Bato ken Brgy. Turod. Dagitoy a demonstration area ti panagtalon ket tinawen a maar-aramid iti kada strategic area a pagtuladan dagiti mannalon.
Insupusop pay ni Mr. Daproza a manam-ayan dagiti mannalon ita a panagtatalon ta tunggal asosasion ket naikkanda iti pagsusublatanda a ramit a pagtalon kas iti hand tractor (kuliglig), hose ken makina (water pump) a pagpakunot ti danum babaen iti panangpataud ti DA-RFO 1 ken ti LGU-Cabugao kadagitoy a pagimbagan dagiti mannalon.
Dagitoy nga aksion ken inisiatiba ket gubuay ti napintek a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno makomplementaran ti regta dagiti mannalon nga agpataud ti umanay a suplay a pagtaraon dagiti umili ken mangnayon ti masapulanda agsipud ta mayoridad dagiti umili ti agdepende iti kangrunaan a pagbiaganda iti Agrikultura ditoy nga ili. # (Web Situational Report)
No comments:
Post a Comment