Cabugao, Ilocos Sur – Iti pannakiuman ti Web In-Action iti kameng ti Committee on Environment and Solid Waste Management, Barangay Baclig, Cabugao, Ilocos Sur itay nabiit, impakaammoda a kaduada ti Sangguniang Barangay ti Barangay Baclig a mangkitkita ti drainage outlet ti danum nga aggapu iti Tiendaan no tiempo ti napigsa a tudo wenno agbagyo. Insupusopda a napintas latta met ti panagbulanos ti danum iti 40 meters a drainage culvert canal ken 30 meters ti kaatiddogna a nasakaban a dadakkel nga imbornal iti uneg ti daga a naitapuak ti danumna iti irrigation main canal ti NIA-SIMABUSA.
Manam-ayan dagiti pumurok ta saanda a malayus no kapigsa ti danum gapu iti pannakaipalawa ti nasao a drainage canal.
Pagyamananda pay dagiti agindeg ditoy a disso iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ta naaksionan dagitoy a kalikagumda a pumurok ken bumarangay ken simmayaat metten ti panagdaliasat dagiti dadduma nga umili kadaytoy a pagbunnongan ti danum no agpigsa ti tudo.
Kabayatanna, nasayud met ti trapiko iti na-Road Widening a National Highway a masakupan pay laeng ti Brgy. Baclig, Cabugao, Ilocos Sur iti batog ti Tiendaan para iti amin a transportasion iti inaldaw a panagdaliasatda. # (Web Situational Report)
No comments:
Post a Comment