Wednesday, December 16, 2015

BLESSING & UNVEILING TI SAKADA MONUMENT, NAANGAY

Cabugao, Ilocos Sur – Naaramid ti Blessing &  Unveiling iti Sakada Monument idiay Salomague Port, Barangay Salomague, Cabugao, Ilocos Sur idi Disiembre 15, 2015.


Inatendaran da Hawaii State Representative Romy Cachola;  Former Rep. Felipe “Jun” Abinsay, Jr.; Mr. Ben Cabreros; ken ni Mr. Danny Villaruz, Presidente ti Ilocos Surians of Hawaii (ISAH). Kaduada pay dagiti Presidente iti nadumaduma a Town Chapter ti ISAH iti Ilocos Sur.

Naaramid ti Opening Program ket kalpasan ti pannakakanta ti Philippine National Anthem ken pannakatokar ti Cabugao Hymn, nag-Welcome Remarks ni 


Mayor Edgardo “Ediboy” S. Cobangbang, Jr.  Kimmablaaw ken nagyaman iti amin a naitaripnong iti programa. Kinuna ni Mayor Ediboy a nagasat ti isasangbay dagiti sangaili manipud iti Hawaii kas panangipamatmat iti agtultuloy a napintas a panaglangen dagiti umili ken kadaraan nga Ilokano iti Estado ti Hawaii ken iti ili a Cabugao.

Innayon ni Mayor Ediboy a naimbag unay a mataliaw met  dagiti sakripisio dagiti Sakada a nakaigapuan ti pannakagun-od ti balligi dagiti nangayed nga arapaap dagiti kailian iti agsumbangir a lugar. Daytoy a panangbigbig iti naballigi a gapuanan dagiti Sakada ket napintasto met nga ipadanon dagiti Delegado  kadagiti kadaraan inton agsublida idiay Hawaii.


Simmaruno ti Unveiling ti naimarka iti Monumento ti Sakada babaen kada Mayor Ediboy; Rep. Abinsay;  ISAH President Villaruz; Rev. Fr. Felix Costales; Philippine Ports Authority (PPA)  Terminal Manager Jerome Balisi ken ni Kagawad Perla de la Cruz ti Brgy. Salomague.

Naisaganad ti Blessing ti Sakada Monument babaen ken ni Rev. Fr. Felix Costales.


Kalpasan ti Cultural Presentation ti Lipit National High School Dancers, nagsarita ni Hawaii Former State Rep. Felipe “Jun” Abinsay, Jr. Kinablaawanna ti amin a naitallaong. Bininsa ti  nag-Diputado iti pateg ti sakripisio, gapuanan ken panangpadayaw kadagiti Sakada a nakaigapuan iti adu a balligi dagiti Ilokano iti Hawaii ken iti naggapuanda nga ili. Pinagyamanan ni Rep. Abinsay ti LGU-Cabugao iti panangidaulo ni Mayor Ediboy  iti pannakabangon ti Sakada Shrine nga agserbi a batonlagip ken historikal a marka ti  pagteng iti Barangay Salomague. 

Nasangaili met ni Vice Governor Deogracias Victor “DV” B. Savellano. Kimmablaaw ken nagyaman ta naaramid ti unveiling a mangipakita ti naindaklan a  pakasaritaan dagiti Sakadas. Imbatad ni Vice Gov. DV a dagiti Sakadas ket isuda dagiti pioneer nga OFWs ket mabigbig ken maikkanda iti agnanayon a pakalaglagipan nga isu ti Sakadas Shrine a naipatakder.


Kamaudiananna, inyawat  dagiti  dadaulo ti Delegasion ti Hawaii nga idauluan da  Former Rep. Abinsay, Rep. Romy Cahola ken ni ISAH President Danny Villaruz iti pannakaited  dagiti Plaque of Appreciation para ken ni Mayor Ediboy iti  lideratona iti pannakaipatakder ti Sakada Shrine ken ti Pammadayaw kadagiti Sangguniang Barangay ti Barangay Salomague nga idauluan ni Barangay Captain Eliseo R. Serrano.

Nakikaysa met da SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Josefina S. Vallejo;  SBM Jayhan Charisma  Alcid-Tan; SBM Atty. Bryan Jett S. Pano; ken ni ABC President Thaddeus “Teddy” U. Soller;  .

Kalpasanna, naulit a nagpabuya dagiti agad-adal iti Lipit National High School Dancers  ken ti Sisim E/S Marching Band. Nagpaay nga Emcee ni Mr. Dario Roy O. Siruno, Municipal Tourism and Information Officer. # (Web In-Action)

No comments:

Post a Comment