Cabugao, Ilocos Sur – Babaen iti koordinasion ti Market Supervisor Office ken ti MENRO Office ti LGU Cabugao, maisayangkat iti nasaknap a panaglinis iti las-ud ti Tiendaan (NISTC Public Market) nangrugin itoy a lawlawas a panamagsagana iti masungad ken kaaldawan ti napaut a Holiday Season 2015.
Imbatad ni MENRO Edgar S. Balangatan a napagnumuanda ken ni Market Supervisor Norma S. Bertumen iti pannakamantener a kanayon iti uneg ti Tiendaan kasta metten a na-landscape dagiti sulsuli iti sango ti NISTC Public Market. Mairaman pay a maasikaso ti sanguanan ti Food Court a daydaywen dagiti Bakasionista/Balikbayan no kastoy a napaut a Holiday Season, segun pay iti MENRO.
Innayon ni Mr. Balangatan a mairaman nga inspeksionen-da dagiti paglakuan ti makan iti uneg ken ruar kas iti pagibellenganda ti danum ken dagiti Comfort Rooms iti uneg a kanayon a madalusan ken mamantener.
Dagitoy a gay-at ket pagtinnulongan dagiti pannakabagi ti Clean and Green kasta metten dagiti Personnel ti NISTC tapno maileppas iti naituding a panawen ket maisagana para iti napaut a Holiday Season.
Dagitoy nga aksion ken inisiatiba ket mayataday iti agtultuloy a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti naan-anay a pannakamantener dagitoy a pampubliko a pasilidad tapno mapagtalinaed iti napintas a pagdalanan dagiti marketgoers ken iti sanitasion para iti sapasap. # (Web In-Action)
No comments:
Post a Comment