Cabugao, Ilocos Sur – Segun ken ni Municipal 4 P’s Focal Person Miss Aida S. Cueto, agtultuloy nga ipakatda dagiti programa ti 4 P’s a pagbulbuligan ti DSWD ken ti LGU-Cabugao nga ipatungpal kadagiti 33 a barangay ti ili a Cabugao, Ilocos Sur.
Iti bulan ti Disiembre 2015, dagiti topiko a nailektiur ket maipapan iti Capacity Building.
Innayon ni Miss Cueto a kalaksidan ti material a pakabuklan ti programa ket maipamaysa met a mairagpin ti pakaseknan ti espiritual a benneg ti panagbiagda tapno mabalanse ti panangsagrapda ti programa ket masustener ti panagbalinda a mapangnamnamaan ken responsable nga umili ti Cabugao, Ilocos Sur.
Buklen dagiti mapan mangmitmiting kadagiti barangay dagiti Team nga idauluan ni Miss Aida S. Cueto a kaduana da Ms. Juliet Madriaga; Ms. Rosemarie Pespes ken ni Ms. Jessie Anne O. Tabut, addada amin iti 4 P’s Municipal Link-Cabugao.
Makikaysa met ni SBM Atty. Bryan Jett S. Pano, Committee Chairman on Social Services.
Maaramid ti panagrikus ti nadakamat a Team ti LGU-Cabugao mangrugi iti umuna a lawas ti Disiembre 2015 babaen iti Clustering Barangay.
Dagitoy nga aksion ken inisiatiba ket gubbuay ti agtultuloy a pro-poor program ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment