Cabugao, Ilocos Sur – Naangay ti Solidarity Meeting dagiti Officiating Officials ken Coaches iti intero a pagadalan ti Probinsia (Elementaria ken Sekundaria) a mangbukel ti Unit I to V maipapan iti maaramid nga uppat nga aldaw (Disiembre 1-4, 2015) a pasalip ti 2015 Ilocos Sur Division Sports Competition a no sadino ket maangay ditoy ili a Cabugao, Ilocos Sur. Naangay ti Solidarity Meeting iti Cabugao Cultural and Sports Complex, Cabugao, Ilocos Sur idi malem ti Nobiembre 30, 2015.
Nasangaili iti nasao a miting ni Governor Ryan Luis V. Singson ket binayabay dagiti Municipal Officials nga idauluan ni Mayor Edgardo “Ediboy” S. Cobangbang, Jr. iti pannakaited ti uniporme dagiti Atleta ken dagiti Coaches para iti maaramid a sinnalip iti uppat nga aldaw.
Iti panagsarita ni Gov. Ryan, bininsana ti pateg ti sports a mangmuli kadagiti ub-ubbing nga agbalin a mapangnamnamaan nga umili ken agpaay ti sports a rangtay iti agtultuloy a kinnaawatan ken panagtutunos para iti agtultuloy a panagdur-as ti Probinsia ti Ilocos Sur.
Nagsarita ni Mayor Edgardo “Ediboy” S. Cobangbang, Jr. iti imatang dagiti Opisiales ti Sports iti DepED-Ilocos Sur nga indauluan ni Mr. Meneleo Palma, CSEE, Education Program Supervisor ti Sports.
Kimmablaaw ken nagyaman ti Ama ti Ili iti panag-Host manen ti ili a Cabugao iti pasalip ti DepED ita a tawen. Dinakamatna ti agtultuloy a panangkomplementar iti Gobierno Lokal ken iti Gobierno Probinsial iti programa ti Sports kadagiti agad-adal tapno maipromot daytoy a tay-ak ti paglaingan a mainayon a manghulma kadagiti ubbing nga agbalin a nalaing nga agad-adal ken mapangnamnamaan nga umili.
Innayon ni Mayor Ediboy nga iti panangidur-as ti programa ti Sports ket kolektibo a pagbibinnadangan dagiti maseknan a sektor iti pageskuelaan.
Nakikaysa da SBM Dr. Jemaima S. Tan–Yee, Committee Chairman on Education; SBM Atty. Bryan Jett S. Pano, Committee Chairman on Sports ken Konsehales nga idauluan ni Vice Mayor DJ Savellano.
Nangited ni Mr. Meneleo Palma, CSEE, Division Sports Coordinator iti instruksion kadagiti kakaduada a mangtarawidwid iti Division Sports Competition para kadagiti nadumaduma nga events a tarawidwidanda ken idauluanda kalpasanna. # (Web In-Action)
No comments:
Post a Comment