Cabugao, Ilocos Sur – Mismo a dagiti Day Care Worker (DCWs) ti umay agala ti kaibatogan nga alaenda a bagas ken dadduma pay a mainayon a pagtaraon a para iti panagpa-Feeding-da iti ituyangda nga eskediul. Rinuk-atan met dagiti pannakabagi ti MSWDO dagiti naited a kasapulan dagiti Day Care Workers kadaytoy nga usuat. Maaramid ti panagpakan kadagiti ubbing kadagiti aldaw a panagbasada iti deretso nga innem a bulan manipud iti panangrugi ti eskediul.
Iti pannakiuman ti Web In-Action ken ni MSWD Officer Mrs. Lydia S. Gazmen itay nabiit, kunana a tinawen a maar-aramid daytoy a programa a para kadagiti ubbing ket inaldaw a maikkanda iti suplementar a pagtaraon babaen iti panangisagana dagiti Day Care Workers (DCWs) kadagiti maluto a maipasango.
Iti agdama, addan iti maikapat a bulan ti programa ti panagpakan ita a Disiembre 2015. Imbatad dagiti Day Care Worker (DCWs) a naannayas ti pannakaipatungpal ti programa kadagiti barbarangay a pakasarakan dagiti Day Care Center (DCC).
Nailunsad ti Supplemental Feeding Program ita nga School Year 2015-2016 kadagiti ubbing nga imatmatonan dagiti Day Care Workers (DCWs) kadagiti Day Care Centers dagiti barangay ti Munisipalidad ti Cabugao a nangrugi idi Agosto 2015. # (Web In-Action)
No comments:
Post a Comment