Tuesday, December 1, 2015

NABALLIGI TI PIESTA TI BRGY. BONIFACIO!

Cabugao, Ilocos Sur – Naangay ti pannakaselebrar ti 152nd   a panagkasangay ni Gat Andres Bonifacio, Bannuar a Filipino ken dadaulo ti Katipunero a nakidangadang kadagiti ganggannaet idi panawenna a naigiddan ti kaaldawan ti panagpiesta ti Barangay Bonifacio idi Nobiembre 29-30, 2015.


Sakbayna, naaramiden dagiti naiplano nga aktibidadesda  kas iti Basketball Tournament (Inter Purok) iti November 26-29, 2015; Day Care Night iti November 29, 2015 ken Barangay Night iti November 30, 2015.

Immuna a naaramid ti “Diana” iti parbangon ti Nobiembre 29 ket nagrikusda a nagtokar  iti  barangay ti grupo ti banda. Naisaganad ti naruay nga aktibidades a nangparagsak iti panagpiesta ti barangay.

Naaramid pay ti Parade of all NGO’s ti barangay kas iti 4 P’s, 4-H Club, RIC, Farmers, PWD’s ken Senior Citizen iti Poblasion.

Iti karabiyan ti Nobiembre 29, 2015, nakoronaan da His Royal Highness JC THIRDY 1st ken ni Her Majesty Queen LORRAINE MARIE 1st babaen iti panangkorona kadakuada da SBM Benedicto M. Savellano  ken ni Miss Mica Singson Mendoza a kinaasmangna 

iti Ari idinto ta iti Reyna ti kinoronaan da Mayor Edgardo “Ediboy” S. Cobangbang, Jr. ken ti kaasmangna a Balikbayan. 


Nangipaay ti panglukat a sarita ni Brgy. Captain Valentin S. Tuyor, Jr. Kimmablaaw ken  pinagyamananna iti annayas ti  panagselebrar ti barangay a pammadayaw iti lagip ken ni Andres Bonifacio ken iti kankanayon a pannakitakunaynay dagiti Opisiales ti Ili ken Probinsia; dagiti Balikbayans, Mangisursuro ken dagiti kalugaranna iti tunggal madanon ti panagpiestada..

Nangipaay ti Mensahe ni Mayor Edgardo “Ediboy” S. Cobangbang, Jr. Kimmablaaw ken nagyaman kadagiti lumugar, dagiti Balikbayan, Mangisursuro, Opisiales ti ili-barangay  ken ni Ms. Mica Singson Mendoza a kangrunaan a nasangaili iti dayta a rabii. Pinagyamanan ni Mayor Ediboy iti  agtultuloy a kinatunos dagiti lumugar  nga agselebrar  ken iti agtultuloy a panagprogreso ti nadakamat a barangay. 

Nasangaili met dagiti Konsehales ti ili nga isuda SBM Danny Q. Gazmen; SBM Vicky S. Serna; SBM  Dr. Jemaima S. Tan-Yee; SBM Atty. Bryan Jett S. Pano; SBM Jayhan Charisma Alcid-Tan; SBM Josefina S. Vallejo; MSWD Officer Mrs. Lydia S. Gazmen; Mrs. Melvie S. Sajonia, School Principal II, Cabugao South Central School ken dagiti Balikbayans.

Nagpaay a Guest Speaker ni Mrs. Eufrocina Naval Pante, Retired Master Teacher ti Cabugao South Central School. Bininsana dagiti napapateg a galad a pangtubay kadagiti ubbing tapno agballigi iti biag ken agbalinda a  naresponsable nga umili. Pinadayawannna met ti kinabannuar ni Andres Bonifacio a nakaigapuan ti panagrambak ken kas maysa a kangrunaan  a bannuar a Filipino gapu iti tured ken panangisakitna kadagiti kailianna.

Nagpabuya dagiti Kindergarten Class nga imatonan ni Mr. Ferico Arcebal, Jr., Day Care Teacher. Naaramid  ti panagsala dagiti Opisiales ti Ili, Balikbayans agraman dagiti Opisiales ti Barangay ken Bumarangay a nagparagsak iti Salonan.


Kabigatan ti Nobiembre 30, 2015 ket naaramid ti Floral Offering iti Monumento ni Andres Bonifacio sa naisaruno iti pannakaaramid ti Parlor Games, Libreng Gupit, Barangay Mass, Luncheon ken naangay ti Barangay Night (nakulminar babaen iti Dance Contest) iti karabiyan dayta a petsa.

Naibasa ti kabibiag ni Andres Bonifacio babaen ken ni Kagawad Remedios S. Cruz idi rabii ti Nobiembre 30. Nagsarita ni Vice Mayor DJ Savellano ket kinablaawanna ti amin a lumugar, dagiti Balikbayan, Opisiales ti Barangay-NGO’s  ken Opisiales ti Ili a kaduana a timmarabay kadayta a rabii. 

Naited met ti gunggona dagiti nangabak iti Inter-Purok Basketball Competition ken ti Dance Contest a nagpartisiparan dagiti nadumaduma nga NGO’s ti barangay iti panagserra ti pabuya. 

Sangsangkamaysa met dagiti bumarangay, Opisiales-da ken agraman dagiti agindeg  a nangsarabo kadagiti nasangailida iti panagpiestada. 

Ti Brgy. Bonifacio ket maysa kadagiti uppat a naprogreso a barangay ti Poblasion nga  idauluan ni Brgy. Captain Valentin Somera Tuyor, Jr.  iti agdama. # (Web In-Action)

No comments:

Post a Comment