GSP NORTHERN LUZON ENCAMPMENTS, MARUGIAN ITA A DISIEMBRE 10 DITOY CABUGAO!

Cabugao, Ilocos Sur – Marugian ita a Disiembre 10, 2015 iti maaramid  a 43rd Junior and 55th Senior Regional Encampments a pagpartisiparan dagiti kameng ti Girl Scouts of the Philippines (GSP) iti tallo a Rehion (Cagayan Valley; Ilocos Region ken ti Cordillera Administrative Region (CAR) a mangbukel ti  15 a Probinsia ken 16 met a GSP Participating Councils  kas iti sumaganad: Cagayan, Isabela, Quirino, Nueva  Vizcaya; Pangasinan; La Union; Abra, Baguio, Batanes, Benguet, Dagupan, Ifugao, Ilocos Norte-Laoag, Ilocos Sur, Kalinga-Apayao,  ken ti Mountain Province.

Madama nga agsangsangpet dagiti Delegado iti nadumaduma a Probinsia ket marugian ti Opening Program iti 3pm iti daytoy nga aldaw.

Kabayatanna, nadibidir ti dua a disso iti pagkampuan dagiti Girl Scouts agraman dagiti GSP  Officials/Leaders. Ti Junior Camp iti akin-amianan a paset ken iti abagatan a paset ti pagkampuan dagiti Senior Girl Scouts a disso ti CPC Camp ken Stella Maris Compound, agpada a masarakan iti igid ti baybay ken ti National Highway,  Barangay Pug-os, Cabugao, Ilocos Sur.

Sakbayna, timmulong dagiti lallaki a Personnel ti LGU-Cabugao a nagisagana kadagitoy a disso para iti uppat nga aldaw (Disiembre 10-13, 2015) a panagkampo/aktibidad  dagiti nadakamat a Girl Scouts.

Naalibtak met a nagtitinnulong dagiti pannakabagi ti linteg (kameng ti Municipal Police Station ken SWAT Team ti PNP) nga agaywan ti linak ken talna iti uneg ken ruar ti pagkampuan ti Girls Scout ket nagpaay met a Multiplier Force dagiti pannakabagi ti MDRRMC-WASAR Team nga idauluan ni Engr. Nestor B. Somera kasta metten dagiti kameng ti Public Safety Officer (Blue Boys);  kameng ti BPATS/Barangay Tanod iti babaen ni Brgy. Captain Arnold “Bambi” V. Yangat ti Barangay Pug-os nga agtultuloy a mangiwardas ti Trapiko iti Entrance/Exit ti Kampo kasta metten kadagiti aglabas a Motorista ken Lugan iti Kalsada Nasional.  # (Web In-Action)