Wednesday, December 16, 2015

CHRISTMAS PROGRAM FOR SPECIAL KIDS, NABALLIGI!

Cabugao, Ilocos Sur – Naangay ti Special Christmas Program dagiti Special Kids iti Stimulation Therapeutic Activity Center  wenno STAC-Cabugao,  GSCS Compound, Brgy. Bonifacio, Cabugao, Ilocos Sur  idi Disiembre 14, 2015  babaen iti Tema: “Bata Kasali Ka, Ikaw ay Mahalaga.”


Nangiburay ti Mensahena  ti Paskua ni SBM  Atty. Bryan Jett S. Pano, Committee Chairman  on Social Services. Bininsana ti pateg ti panangkibin ken panangsuporta  ti LGU  iti STAC-Cabugao iti  panangidaulo ni Mayor Edgardo “Ediboy” S. Cobangbang, Jr. tapno matulonganda  a tuman-ay dagitoy  nga ubbing a mangrimbaw    iti   agdama a kasasaadda. 

Daytoy a selebrasion ket napateg a maaramid tapno maibilangda latta met a makipaset iti nasaknap a pannakaselebrar ti Paskua. Kimmablaaw pay ti Konsehal agraman ti Pamiliana iti Naragsak a Paskua ken Nagasat a Baro a Tawen para iti sapasap nga umili. 


Impaay met ni Vice Mayor DJ Savellano ti Mensahena iti Paskua. Panagiinnayat ken panagkaykaysa iti sapasap ti  bugas ti mensahena ita a Paskua 2015. 

Pinagsapata ni Vice Mayor DJ Savellano dagiti Opisiales ti Asosasion dagiti nagannak iti STAC- Cabugao. Nagited pay iti sagut dagiti dua a nadakamat nga Opisiales ti LGU-Cabugao kadagiti ubbing.

Naangay pay ti Parlor Games a nakagun-odan dagiti nangabak iti agkakapateg a premio. Ti STAC ket matarawidwidan babaen iti salinong ti MSWD-Cabugao nga idauluan ni Mrs. Lydia S. Gazmen, MSWD Officer.  # (Web In-Action)

No comments:

Post a Comment