Cabugao, Ilocos Sur – Naangay ti OHANA Medical Mission babaen iti Ilocos Surian Association of Hawaii; Siloam Christian Academy, Quezon City; Rotaract, Batangas City; Cabugao Sons and Daughters Association of Hawaii ken ti Filipino Chronicle of Hawaii.
Indauluan ida ni Dr. Charlie S. Sonido, M.D. dagiti Dodoktor, Nurses ken Medical Representatives kadagitoy nga asosasion ket naaramid ti maysa nga aldaw a panagagas idi aldaw ti Disiembre 15, 2015 iti mismo nga Rural Health Unit (RHU) Building, Cabugao, Ilocos Sur. Sakbayna, nagagasda iti maysa nga aldaw idiay Cuantacla Sports Center, Brgy. Cuantacla, Cabugao, Ilocos Sur idi Disiembre 14, 2015.
Dupudop ti napan nagpaagas nga umili tapno gundawayanda ti naipaay a libre a medical treatment ket nakategoria dagiti nagagasanda iti Medical, Dental, Surgery (Minor kas iti operasion ti cysts ken circumcision), Pedia, BP, Glucose Count.
Timmulong met dagiti Medical Personnel ti RHU Cabugao nga idauluan ni Dr. Bernardino P. De Gracia, OIC Municipal Health Officer kadagiti bisita a Dodoktor.
Impakaammo ti Medical Representative-da a nangipaayda ti libre a serbisio ti panagagas ken libre nga agas para iti pito a disso a turongen ti Medical Team-da ditoy Ilocos Sur.
Iwayatda ti Medical Mission kadagiti ili ti Probinsia ti Ilocos Sur manipud Disiembre 12, 2015 agingga inton Disiembre 19, 2015.
Daytoy a tignay-sibiko ken medikal ket ar-aramiden ti grupo ket maysa ti ili ti Cabugao, Ilocos Sur a mabembenepisiaran kadaytoy babaen iti nasinged a pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti daytoy a Medical Mission Group.
Naaramid pay ti Luncheon ken panagsasarita nga insagana ti LGU-Cabugao kadagiti sangaili a taga-ballasiw taaw iti Municipal Conference Building kas panangiparikna ti nabara a panangsarabo ti Pamilia-LGU Cabugao ken dagiti umili ti Cabugao, Ilocos Sur kadakuada. # (Web In-Action)
No comments:
Post a Comment