Cabugao, Ilocos Sur – Inawat dagiti Opisiales ti Cabugao Ilocos Sur Tricycle Operators Drivers Association, Inc. (CISTODAI) ti gatad a kinalikagumanda iti Gobierno Munisipal ti ili a Cabugao idi Marso 10, 2016 ditoy Munisipio.
Inyawat da Mayor Edgardo “Ediboy” S. Cobangbang, Jr. ken ni SBM Danilo Q. Gazmen, Committee Chairman on Transportation ti Tseke nga aggatad iti P150,000 kada CISTODAI President Dominador Andres; Vice President Elmer Valenton; Treasurer Reyno Sandi ken ni Auditor Winifred Solmerin.
Iti pannakiuman ti Web In-Action, imbatad ni Vice President Elmer Valenton a naikkanen ti sag-P5,000 a pundo dagiti asosasion ti traysikelan iti kada barangay nga addaan iti kompleto nga Opisiales ken paglintegan ket mainayon manen daytoy a nagun-odda a pundo a mausar iti pakatulonganda a pagimbagan ti amin a traysikelan iti Pederasion.
Impeksada nga Opisiales ken kameng ti CISTODAI iti naan-anay a panagyamanda iti Gobierno Munisipal iti naited kadakuada a pagpuonan ti asosasionda a kinalikagumanda iti Transport Group Sector ti ili.
Kabayatanna, imbatad pay dagiti Opisiales a sumaysayaat ti operasion dagiti traysikelan a kangrunaan a nakaigapuan ti pannakabukel ti CISTODAI. Maigapu iti napintas a panagkikinnaawatanda nga Operators ken Drivers ket nalaklakada a risuten ti rumsua a pakaseknan ken problemada iti panagpasadaan. # (Web In-Action)
No comments:
Post a Comment