Cabugao, Ilocos Sur – Idadauluan ti Grupo ti Clean and Green Program ti Munisipio nga imatonan ni MENRO Edgar S. Balangatan, AT iti pannakalinis dagiti kalsada iti Processional Route iti Poblasion kasta metten iti Kalsada Nasional (Manila North Road ken ti Brgy. Baclig to Brgy. Salomague Road) kasta pay ti Provincial Road a mangkamang kadagiti dayaen a barangay ti ili a Cabugao (Brgy. Cuancabal-Lipit-Brgy. Nagsincaoan Road) nangruna ita ta umadani iti panagselebrar ti Semana Santa 2016 ken iti panagpiesta ti ili a Cabugao inton Abril 2016.
Kabayatanna, iti pannakaitandudo ti Clean and Green Program kadagiti barangay ken eskuela, iyunay-unay ni Mr. Balangatan kadagiti Opisiales ti Barangay a kitaenda koma no adda maip-ipan a rugit kadagiti igid ti kalsada ken kanto iti barangay ta maikkat dagitoy. Kas paset ti Cleaning Drive ti Barangay, mairaman koma nga aramiden dagiti bumarangay nga agdaldalus tapno makomplementaran ti ar-aramiden ti LGU ket dalusanda met dagiti mabatoganda a paset ti Provincial/National Road iti masakupanda.
Iti Coastal barangay, imbatad ni MENRO Balangatan a babaen iti pannakikoordinar-da ken regular a panagmonitor-da ket maar-aramid latta ti bayanihan dagiti bumarangay iti regular coastal clean-up malaksid iti panangtaripatoda kadagiti mulada a mangrove nga isayangkat dagiti dadduma a sektor ti barangay.
Dagitoy nga inisiatiba ket mailungalong a kanayon kadagiti barangay ken iti Poblasion tapno mamantener ti kinadalus a pakairanudan met laeng iti amin nga umili, segun pay ken ni MENRO Balangatan. # (Web In-Action)
No comments:
Post a Comment