SUPPLEMENTAL FEEDING PROGRAM TI LGU, NAGLEPPAS

Cabugao, Ilocos Sur –Nagleppas ti Supplemental Feeding Program ti Munisipio iti  bulan ti Marso 2016 nga impatungpal ti MSWDO nga idauluan ni MSWD Officer Mrs. Lydia S. Gazmen kadagiti Day  Care Pupils kadagiti barangay ti ili a Cabugao, Ilocos Sur iti unos ti innem a bulan  (24 Weeks) iti panagbabasada iti Tawen 2015-2016 (Oktubre - Marso 2016).

Iti pannakiuman ti Web In-Action ken ni MSWD Officer Mrs. Lydia S. Gazmen, kunana a naballigi ti implementasion ti Supplemental Feeding Program a naaramid iti innem a bulan kabayatan ti  panagbasa dagiti ubbing iti Tawen 2015-2016. Innayonna a kinomplementaran met  dagiti Day Care Workers (DCWs) iti napasnek a panagisuroda ken nangiturong  kadagiti ubbing nga inaywananda tapno naan-anay ti balligi ti panggep ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a panangmulida iti panagtan-ay dagiti ubbing tapno agbalinda a naresponsable nga umili. # (Web In-Action)