Cabugao, Ilocos Sur – Malaksid iti inaldaw a panagagas dagiti Medical Personnel (Doktor, Nurse, Midwives, Dentist ken RN-Heals) iti Rural Health Unit-Cabugao ket maar-aramid met ti panagtignay dagiti sanga ti serbisio ti salun-at kadagiti 33 a barangay ti ili a Cabugao, Ilocos Sur.
Kabayatanna, agtigtignay dagiti RN-Heals Nurses nga ag-profiling tapno maammuan ti eksakto a kasasaad dagiti lumugar pakaseknan iti salun-atda.
Maibasar kadagiti report, maaksionan a daras dagiti rumsua a sakit no adda man babaen kadagiti pannakabagi ti RHU-Cabugao. Ket gapu ta mataming a nasapsapa ket maalay-ayan ti panagwarasna iti lokalidad, segun ken ni Dr. Bernardino P. De Gracia III, Medical Officer III ken OIC Municipal Health Officer.
Iti biang met ti Community Health Team (CHT) iti Barangay, ar-aramidenda dagiti pagrebbenganda ket dagiti magapuananda ket mapagkaykaysa iti reportda a maited iti RHU-Cabugao para iti pannakainayon ken pakaammuan ti Municipal Health Office (MHO-Cabugao) iti kasasaad dagiti kakaduada nga agtartarabaho iti benneg ti salun-at kadagiti barangay.
Kabaruanan a programa ita ti DOH ket iti pannakaaramid ti sugar testing ti dara babaen kadagiti Medical Technologists nga umay ditoy RHU iti mayeskediul a pannakaigannuatna.
Dagitoy nga aksion ken inisiatiba ket gubuay ti napintas a koordinasion dagiti maseknan nga Opisina/Ahensia iti salinong ti LGU-Cabugao nga idauluan ni Mayor Edgardo ”Ediboy” S. Cobangbang, Jr. para iti agtultuloy a pannakamantener ti salun-at dagiti umili ti Cabugao, Ilocos Sur. # (Web In-Action)
No comments:
Post a Comment