MAIKA-19 A GENERAL ASSEMBLY TI FREE FARMERS MPCI, NAANGAY

Cabugao, Ilocos Sur – Naangay ti maika-19  a  General Assembly manipud ti pannakabuangay ti Sagayaden  Free Farmers MPCI iti Sagayaden Norte, Cabugao, Ilocos Sur idi Marso 3, 2016 ket naangay  ti miting iti sango ti Free Farmers MPCI Warehouse and Cooperative’s Ground  a dinar-ayan dagiti Miembros ken Opisiales ti Kooperatiba, naawis a Sangaili, Opisiales ti Barangay Sagayaden ken pannakabagi ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Naaramid ti Asemblea babaen iti Tema: “Koop Itandudo Tapno Progreso Maragpat Tayo.”

Immuna a Parte ti Programa iti Registration of Members and Participants babaen kadagiti kameng ti Secretariat iti 8:00 am 9:00 am.

Simmaruno a naluktan ti programa babaen iti Opening Prayer nga indauluan Ms. Erlinda Siababa, BOD Member. Indauluan met ni Ms. Joanna Cris Argel ti National Anthem, Cooperative Hymn ken ti Cooperative Pledge, Welcome Address ti binagi ni Mr. Benedicto Satumba, BOD Chairman. Dinakamatna iti punganay, napalabas ken agdama a kasasaad ti Kooperatiba ken dagiti nabukel a pagannurotanna a maipatpatungpal iti agdama.

Panangipateg ti kooperatiba a kas katulongan iti panagdur-as ti bugas dagiti mensahe da Mr. Josh Edward S. Cobangbang ken ni ABC President Thaddeus U.  Soller a naawis iti taripnong. Nagatendar met ti pannakabagi ti DA-LGU Cabugao nga isu ni Mr. Nereo S.  Daproza, AT, Municipal Cooperative Coordinator.

Nagmensahe  ni Mayor Edgardo “Ediboy” S. Cobangbang, Jr.  Inapresiarna ti agtultuloy a panagprogreso ti Free Farmers MPCI.

Imbinsa ni Mayor Ediboy iti pateg ti panagbalin ti Sagayaden Free Farmers MPCI nga ehemplo ken tuladen ti dadduma a kooperatiba. 

Pinagyamanan pay  ti Ama ti ili iti agtultuloy a pammati ken panagtalek dagiti dadduma nga ahensia iti Gobierno kadagiti iwayat ti kooperatiba  a programa ken magun-odda a proyekto. Sitatalek met ti Gobierno Munisipal a tumulong kadagiti mannalon   gapu iti panagbalinda a responsable a mangpadakkel kadagiti maited kadakuada a puonan ken proyekto  a maipaay iti pagsayaatan  ti sapasap.

Insupusop pay ti Ama ti Ili nga agtultuloy koma ti napintas a panagrubuat ti kooperatiba tapno ad-adu pay ti maragpatna  a pagsayaatan a pakairanudan dagiti kameng ken kadagiti agnanaed iti komunidad a masakupan ti serbisio ti Kooperatiba.

Nangipaay met ti Mensahe ni Barangay Captain Virgilio Piros ti Barangay Sagayaden. Dinayawna ti napintas a maipampamatmat a kabaelan dagiti kalugaranna a mangtartarawidwid ti Kooperatiba. Pinagyamananna ti LGU-Cabugao iti agtultuloy a panangtarabayna kadagiti programa ken proyekto ti nadakamat a Kooperatiba.

Naaramid ti Open Forum. Naballigi a natratar ken nataming dagiti pakaseknan ti Asosasion ken dagiti kamengna.

Naitultuloy ken naangay  ti Business Meeting ti Sagayaden Free Farmers MPCI iti kamalmanna. 

Segun ken ni Ms. Dominica Sayaboc, Secretary, addaanen ti Kooperatiba iti 550 a Members; 28 Million a pakabaloran ti sanikuana (Assets); 6.5 Million a pakabuklan ti Share of Stocks; ken 1.99 Million a pakabuklan ti   Net Income iti agdama.

Ti Kooperatiba ket idauluan ni Mr. Zosimo Sayaboc, Manager. 

Nagun-od ti Sagayaden Free-Farmers MPCI iti “Grand Slam” iti nagsasaganad a tawen a  panangabakna a kalalaingan a Barangay-Based Cooperative iti Ilocos Sur babaen iti “Siglat Awards”  a nakisalipanna. # (Web In-Action)