Cabugao, Ilocos Sur – Kalpasan ti Flag Raising Ceremony ti Pamilia LGU-Cabugao iti Marso 28, 2016 iti sango ti Municipal Hall, nagsarita ni Mayor Edgardo “Ediboy” S. Cobangbang, Jr. iti imatang ti Pamilia-LGU ket
kimmablaaw ken pinagyamananna iti pannakaipatungpal dagiti pagrebbengan dagiti nadumaduma a Departamento ti LGU-Cabugao kasta metten kadagiti nakasalinong nga Ahensia iti rugi, kabayatan ken kalpasan ti napaut a bakasion iti Nangina nga Aldaw (Semana Santa 2016).
Dinakamat ti Ama ti Ili iti alerto ti Kapolisan ken BFP ken dadduma pay a sektor wenno grupo a timmulong iti pannakaaramid dagiti trabahoda kabayatan ti pannakaselebrar ti Semana Santa 2016 nangruna iti pannakaaywan ti linak ken talna ken ti trapiko iti Manila North Road (Kalsada Nasional).
Dinakamat pay ti Municipal Chief Executive iti makapabang-ar-rikna a damag manipud kadagiti agbakbakasion ita a Balikbayan iti ili iti napintas a pannakapasangbayda ken pannakaasikasoda a kas kliente ditoy Munisipio ket inggunamgunam ni Mayor Ediboy a maitultuloy koma latta dagitoy a tagipatgen a galad a maipakpakita ken iparparikna ti sapasap kadagiti Bakasionista.
Kabayatanna, naiyam-ammo iti Pamilia-LGU dagiti dua a nainayon a baro a kameng ti BFP-Cabugao. # (Web In-Action)
No comments:
Post a Comment