Monday, October 10, 2011

CERTIFICATE OF LOYALTY, NAITED ITI 22 NGA EMPLEADO TI LGU-CABUGAO

Cabugao, Ilocos Sur (Oktubre 10, 2011) – Nagbuligan ti LGU-Cabugao ken ti Civil Service Commission a binigbig  ti 22 nga empleado ti Gobierno Munisipal gapu iti atiddog a panawen ken napintas a rekord ti  panagserbida  iti Gobierno ken ti umili  ti Cabugao, Ilocos Sur.

Mismo nga iti Ama ti Ili, Mayor Edgardo “Ediboy” S. Cobangbang, Jr. ken Director Hedy Jose  B. Lardizabal,    Director 11-CSC, ISFO ti nagtinnulong a nangyawat kadagiti sertipiko dagiti napadayawan nga isuda dagiti sumaganad: Oscar S. Belandres, 37 a nagserbisio, Marietta S. Cruz, 36 years in service; Lydia Socias Gazmen, 30 years; Dionicia R. Seatruz, 30 years; Rosita A. Aquino, 30 years; Teresita Maximina S. Sison, 25 years; Editha Z. Galamgam, 25 years; Manuel P. Gorospe, 25 years; Nena E. Sumagit, 25 years; Yolanda C. Sipin, 25 years; Myrna S. Valenton, 25 years; Lucila S. Somera, 25 years; Gemma S. Castillo, 20 years; Gliceria S. Salamanca, 20 years; Racquel S. Ancheta, 20 years; Lilia S. Flores, 20 years; Jerry D. Lopez, 20 years; Arnel S. Evangelista, 20 years; Teresita S. Bana, 20 years; Reynold S. Cruz, 10 years; Maxfel S. Suboc, 10 years; Elvira G. Satumba, 10 years.

Kinablaawan ken nagyaman ni Director Lardizabal kadagiti empleado ti LGU nga indauluan ni Mayor Ediboy kasta met kadagiti kameng ti  PNP Municipal Police Station ken Bureau of Fire Safety Station ti ili a Cabugao. 

Imbatad ti opisial ti CSC  a pammasingked ti  kinapudno dagiti empleado ti atiddog a tawen a panagserbida ket taginayonenda koma daytoy. Innayon pay ti Direktor  a marukod koma ti kaipapanan ti panagserbi babaen ti pannakaited iti umisu a kalikagum  ti tao ken  karbenganna a serbisio nangruna kadagiti umili nga agnanaed iti adayo iti Munisipio.

“Agnanayon a pakalaglagipanyo  iti nagapuananyo dayta a naited a sertipiko. Ngem masapul  nga adda  kaipapanan ti kaaddatayo ditoy: ti panagserbitayo a napasnek ken napudno  kadagiti umili. Masapul latta a  nadayaw ken  itag-aytayo ti integridad ti opisina nga ayantayo,” impeksa met ni Mayor Ediboy kadagiti naitaripnong.


“Dakayo a naub-ubbing ti serbisio, agreggetkayo a mangtegged ti kasta met a pammigbig.   Aywananyo  ti naited a talek  kadakayo.  Agtalinaed koma  iti prinsipio  a  mangitandudo ti interes ti kaaduan nga umili,” innayon pay ni Mayor Ediboy.

Ti Civil Service Commission-Ilocos Sur Field Office (CSC-ISFO) nga idauluan ni Director Lardizabal ket tinawen a makikammayet kadagiti Gobierno Lokal a mangbigbig kadagiti regular nga empleado a nakagun-od ti pangrugian a  lima a tawen ken umagpang ti kada lima a tawen nga agpangato iti serbisioda kadagiti opisina ken Ahensia ti Gobierno  a masakupan ti Serbisio  Sibil. # (Insurat ni JOED SAJONIA, ab photography)

No comments:

Post a Comment