Thursday, October 27, 2011

FIELD DAY TI AGRI-PINOY CLUSTER TECHNO-DEMO, NAARAMID

Cabugao, Ilocos Sur (Oktubre 27, 2011) – Naisayangkat ti Field Day dagiti 24 a  Field Cooperators ti 5-Hectares  Agri-Pinoy Techno-Demo on Hybrid Rice in Irrigated Areas  iti Barangay Pug-os ken Barangay Namruangan idi Oktubre 26, 2011 sadiay arubayan ti pag-urnuan ni Mr. Elmer G. Bromeo, ti  Barangay Pug-os, Cabugao, Ilocos Sur.

Naguurnong dagiti mannalon ken nagatendar iti Field Day Site ket immuna a pinasiarda ti nakaimulaan ti Arize  Bigante, TH 82 ken Malakas iti kataltalonan  sada nagsubli iti pakaangayan ti programa a pagipresentaranda kadagiti datos ti wagas ti panangpatan-ayda kadagiti nadakamat a klase ti pagay.
Iti naangay a programa, impeksa ni Pug-os Brgy. Captain Arnold V. Yangat ti yaman ken ragsakda a mangabrasa kadagiti programa ti DA ken LGU’s kadagiti  mannalon iti barangayda.

Grupo dagiti farmer-cooperators, Barangay Pug-os ken Namruangan. Nairaman iti ladawan da OIC Reg. Dir. Ibea, MA Zeny Andrada, Provincial Agriculturist Tante Butacion
Nasangaili iti nasao a taripnong da OIC DA Regional Director Wilma Ibea, Ilocos Sur Provincial Agriculturist Constante Butacion, dadaulo  ken kameng ti gunglo ti mannalon  iti dadduma a barangays,   Brgy. Captain Valentin S. Tuyor, Jr. ti Brgy. Bonifacio, Brgy. Captain Alex Siruno ti Barangay Cacadiran, ken Brgy. Captain Mario Peralta ti Brgy. Nagsantaan.

Trinatar da Mr. Nereo Daproza, Municipal Rice Program Coordinator ken Mr. Obas Billy Baclig, Supervising Technologist  ti pannakaisagana dagiti  maiparang a datos. Ni met  Rice Techno-Demo Coordinator Edgar S. Balangatan ti nagasikaso ti  preparasion ti nasao nga aktibidad. 

Napusgan ni Mr. Bert Vicente a nagipresenta ti Barangay Pug-os idinto ta ni Mr. Benjamin Castillo ti Barangay Namruangan. Natalged ti riknada a nagilawlawag ta ammodan a  pimmasada iti 6.5 tonelada/ektaria nga ideal a maapit iti maysa nga ektaria itoy a panagmulada ti Hybrid Rice. Timmaud a salsaludsod  ket  iti panangdamagda ti kaaduan a sekretoda no kasano a nakaapit dagiti farmer-cooperators manipud iti 7 tons agingga iti 10 tons ti kada ektaria partikular ni Mr. Henry Saliganan ti Barangay Pug-os a nakaala ti 99% .

Dinayaw da OIC Director Ibea ken Provincial Agriculturist Butacion daytoy a resulta ken nagapuanan ti grupo. Ti pannakalaw-asda ti inapit iti 6.5 Tons per hectare nga ideal  a pagbasaran ket mangipakita ti nadur-as nga implementasion ti programa ti panagmulaan ti Hybrid nga itantandudo ti  Ahensia ken LGU’s ditoy ili a Cabugao, segun kadagiti opisiales ti DA.

Nagyaman met dagiti farmer-cooperators ket kiniddawda ti  pannakaaramid manen ti  Farmers Field  School (FFS)  iti sumarsaruno a panagmumula ti pagay a tinung-edan a dagus ti DA-RFU 1 ken DA Provincial Office.

Nagpasiar dagiti nag-Field Day iti disso a nakaimulaan dagiti klase ti Hybrid Rice a naimula.
Nagsarita pay iti imatang dagiti mannalon dagiti pannakabagi ti National Food Authority (NFA), Land Bank,  Vigan City, National Agribusiness Corporation  ken MRJ Foliar Fertilizer a manamnama a  makatulong pay kadagiti mannalon iti naballigi a panagtalonda.

Indauluan  ni Mr. Elmer G. Bromeo, Lead Farmer Cooperator ti Barangay Pug-os ken agdama a Farmers’ Federated President iti panagyamanda  kadagiti opisiales ti DA, padana a mannalon ken  cooperators, bisita, kakapitanes ken iti panangtartarabay kadakuada ti  Gobierno Munisipal ken DA-LGU babaen ti liderato da Mayor Edgardo  “Ediboy”  S. Cobangbang, Jr. ken Mrs. Zenaida S. Andrada, Municipal Agriculturist iti naan-anay a panagballigi daytoy a pasamak. # (JOED SABIO SAJONIA)
Bert Vicente, Farmer Cooperator, Barangay Pug-os
Benjamin Castillo, Leader, Farmer Cooperator, Namruangan
OIC Regional  Director Wilma Ibea, DA-RFU 1
Rodel Ballesteros, Land Bank of the Philippines

No comments:

Post a Comment