Cabugao, Ilocos Sur – Inrubuat ti intero nga umili ti Cabugao ti pannakaselebrar ti Children’s Month iti bulan ti Oktubre babaen ti panangtarabay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken iti panangtarawidwid ti opisina ti Municipal Social Welfare and Development Office (MSWDO) babaen ken ni Mrs. Lydia S. Gazmen, Municipal Social Welfare and Development Officer ken ti Federated Day Care Workers’ Association nga idauluan ni Mr. Rudy A. Ilar idi Oktubre 19, 2011 iti Cabugao Cultural and Sports Complex, Brgy. Rizal, Cabugao, Ilocos Sur.
Nagatendar dagiti Day Care Workers kadagiti barangays ken kasta met dagiti nagannak a nangkuyog kadagiti nakisalip nga ubbingda iti Draw and Tell Contest a naitampok iti aktibidad.
Panglukat a sarita ti naited ken ni Mr. Gilbert Seguritan, Federated Day Care Parents Service Group President nga insaup ni Mr. Crispolo Arcebal, Day Care Worker ti Brgy. Cuancabal.
Naited ti “Overview of the Children’s Congress” babaen ken ni Mrs. Lydia S. Gazmen, MSWDO idinto ta innaganan met ni Mr. Ronie Solar, Dardarat Day Care Worker dagiti mangbukel ti Board of Judges.
Iti mensahe ni Mayor Ediboy, kimmablaaw ken nagyaman kadagiti amin a nagatendar iti nasao a selebrasion ket dinakamatna ti napateg a panangipamaysa ti Gobierno Munisipal iti pagsayaatan a programa ken pannakaprotehir ti karbengan dagiti ubbing. Innayonna a daytoy a panangipamatmat dagiti ubbing kadagiti talento ken abilidadda ket bunga ti napintas a pannakaisuroda iti biang dagiti Day Care Workers ken dagiti nagannak.
Agpadpada met da Vice Mayor Danny Q. Gazmen ken SBM Carlito S. Pano, M.D., Chairman, Committee on Health a nangikumit iti panangitandudoda iti aniaman a pagsayaatan a linteg para kadagiti ub-ubbing a mapanday iti laem ti Konseho Munisipal.
Iti salip ti Draw and Tell, nagpaay a Chairman iti Board of Judges ni Mrs. Jerlie S. Cobangbang, kapisi ti puso ni Mayor Ediboy, ken kinatinnulongna da SBM Vicky S. Serna ken SBM Jemaima Soller Tan-Yee.
Naglektiur met ni PO3 Bernadette R. Aquino maipapan iti nagkaadu a karbengan ken panangproteksion ti linteg kadagiti ubbing. Imbinsabinsa ti Policewoman iti pateg ti panangrespetar ti kaaduan ti kalintegan dagiti ubbing agsipud ta dakkel ti kaibatoganda kadagiti napanday a linteg nupay addada iti menor de edad a kasasaad.
Binagi ni Ms. Arlene Brosas, pannakabagi ti AKAP BATA Partylist iti nalawlawa a panangimutektek ti kasasaad dagiti ubbing iti kagimongan. Imbagana a nabuangayen ti Commnittee on Children iti Nababbaba a Kongreso iti Pilipinas ket daytoy ti mangipasimudaag ti napasnek a panangikaso ti Gobierno iti pannakataming ti kalintegan, karbengan ken pannakaidur-as ti pagsayaatan dagiti ubbing.
Segun iti Partylist Representative, epektibo ti homebased-teaching, child participative activites kas iti maaramid iti selebrasion iti panangmuli kadagiti ubbing kadagiti talentoda. Nainayon pay a dinakamatna maipapan iti panangtiped iti “child pornography”.
Katinnulong ti AKAP BATA ti Catholic Bishops’ Conference of the Philippines (CBCP), NCCP, UCCP, Rotary Clubs, nadumduma a civic organizations a mangmobilisar iti komunidad a tumulong kadagiti ubbing para iti nasaysayaat a pagbanaganda kas iti pannakaangay ti seminar-workshops, pannakaited ti proyekto, ken pannakikammayet kadagiti Local Government Units (LGU’s) nangruna iti DSWD-MSWDO ken iti Kongreso ti Pilipinas.
Dagiti naikkan ti premio a nagpartisipar iti Draw and Tell ket dagiti sumaganad:
1ST Prize, Cleo May Medina, NISTC Day Care; 2nd Prize, Tefanie Joy Bayani, Salapasap Day Care; 3rd Prize, Kian Shienler Gaspar, Cuancabal Day Care. # (Insurat ni JOED SABIO SAJONIA/Nagretrato, Alvin S. Solis)
 |
| Iti panagsarita ni Ms. Arlene Brosas, pannakabagi ti AKAP BATA Partylist ti naangay a Children's Month iti ili a Cabugao |
No comments:
Post a Comment