INSENTIBO TI NAGMULA TI KAYO, IMBUNONG TI TANIM KALIKASAN KEN LGU-CABUGAO

Cabugao, Ilocos Sur – Nagiwaras ti Tanim Kalikasan, Inc.  ken LGU-Cabugao  insentibo ken abuno  kadagiti nagmula ti tree seedlings kadagiti nadumaduma a barangay iti ili ti Cabugao babaen ti panangasistir  da Mr. Gil de la Cruz, Field Coordinator ti NGO   ken MENRO Edgar S. Balangatan, Agricultural Technologist ti DA-LGU-Cabugao idi Oktubre 4-5, 2011.

Dagiti barangays a pagnaedan  dagiti  nagmula ken pakasarakan dagiti naimula a seedlings ket iti Brgys. Cacadiran, Cuantacla, Carusipan, Aragan, Sisim, Bungro, Sabang, Pila, Sagayaden, ken  Maradodon a no sadino a ditoy ket kangrunaan a tumartarabay dagiti Kapitanes ken opisiales kadagitoy a nadakamat a lugar.

SBM Jemaima S. Tan-Yee (R); Mr. Eddy Sevilleja (Center); Edgar S. Balangatan (L)

Paset daytoy ti direktiba ni Mayor Ediboy S.  Cobangbang, Jr. ken  iti pannakinaming ni SB Member Jemaima S. Tan-Yee, M.D., Chairman, Committee on Environment  iti  regular a  pannakamonitor ken pannakasustener ti kasapulan dagitoy a naimula  a kayo tapno manamnama a pakairanudanto dagiti maseknan nga umili iti imbag nga itdenda iti masanguanan.

Segun ken ni MENRO Balangatan, naireport manipud iti aktual a pannakabisitana ti umabot iti  70,160  a kapuon ti nagbiag iti 76, 260 a pinuon ti seedlings a naimula  a  nadakamat a barangays.

Innayon ti MENRO a naikkan dagiti nagmula  iti P.50 ti tunggal kapuon a nabiag a naimula  no la ketdi nasurot ti pagannurotan nga intuyang ti Memorandum of Agreement (MOA) iti nagbaetan   dagiti nagmula  ken ti NGO (Tanim Kalikasan, Inc.).

“Tapno manamnama a natalubo   ti panagtan-ay dagitoy a naimula ket naganagananda iti napaglaok a 14-14-14 (complete) ken 21-0-0(Ammonium Sulphate), 5-10 grams per hill   ken naigunamgunam kadagiti nagmula ti panangaywanda iti panagdakkel dagiti naimulada,” impasingked ni MENRO Balangatan. # (Interbiu/Insurat  ni JOED SAJONIA)