Monday, October 17, 2011

1st MULTI-SECTORAL TREE PLANTING, NAARAMID ITI ILI TI CABUGAO

Cabugao, Ilocos Sur (Oktubre 15, 2011) –     Naaramid ti panagmula ti  kayo (Fruit  tree seedlings)  iti igid ti Karayan Cabugao a masakupan ti Barangay Baclig ken Barangay Rizal idi Oktubre 15, 2011 kalpasan ti  ababa a programa a naaramid iti sango ti Greenhouse ti Munisipio  a    nagatendaran  ti 488 a kamkameng ken opisiales  ti nadumaduma nga organisasion, pribado ken publiko,  a tinarabay dagiti opisiales ken empleado ti Gobierno Munisipal  ti Cabugao.

Dagiti kameng ti media (KBP) a nakipaset iti nasao a Tree Planting

Kanaig daytoy nga aktibidad  iti pannakaselebrar ti Provincial  Cooperative Month nga addaan ti tema: “Transformative  Cooperative  Advancing People, Planet, Prosperity and Peace”. Ken sub-theme: “Kooperatiba, sama-sama sa pagkandili ng kalikasan.”

Nagsarita  ni Mr. Agapito P. Pablico, Chairman, Provincial Cooperative Union ken  Presidente  ti Ilocos Sur League of Civil Societies. Nagyaman iti anep dagiti nakipagmula, ti suporta ti LGU’s iti NGO’s kas kapartnerna itoy a gannuat a pannakaitultuloy ti panagmula ti kayo a mainayon a sarikedked ti sumagsaganad a henerasion. 

Impeksa met ni Turod  Brgy. Captain Inocencio Sadac, Chairman, Municipal Cooperative Development Council, Cabugao, ti panagyamanda iti suporta ti Gobierno Probinsial ken iti biang ti   Gobierno  Munisipal babaen iti liderato ni Mayor Ediboy S. Cobangbang, Jr. ti balligi daytoy a gannuat.

Iti programa ken panagringpas ti tree planting,  naregget a nakipagtarabay  da SBM Jemaima Tan-Yee, Chairman, Committee on Ecology and Environmental Management, LGOO Connie Quinola ti MLGO-Cabugao, ABC President,  Rizal Brgy. Captain Teddy U. Soller ken dimmanggay pay dagiti kakapitanes ti barangays ti ili, opisiales ken mangisursuro,  kasta met dagiti umili a pannakabagi  iti nadumaduma nga opisina ken ahensia ken uray iti pribado a sektor.


Dagiti kapitanes iti Barangay ti Cabugao nga idauluan ni ABC President Teddy Soller
Dagiti kangrunaan a sektor/asosasion a nangorganisar   iti Tree Planting ket dagiti sumaganad: Cooperative Development Authority-Ilocos Sur, Provincial Cooperative Union-Ilocos Sur, Provincial Cooperative Development Council-Ilocos Sur,  Municipal Cooperative  Development Council-Cabugao, Provincial Government of Ilocos Sur, Local Government Unit of Cabugao,  Ilocos Sur League of Civil Societies, Municipal Association of Non-Government Organizations, ken Kapisanan ng mga Brodkasters sa Pilipinas. # (Insurat ni JOED SABIO SAJONIA/ab photography)

Iti panagrehistro dagiti nagatendar iti nasao a Tree Planting
Napasnek dagiti NGO’s a nakipagmula iti tree seedlings kas ipakita ti ladawan
 (Right) Ni LGOO Connie Quinola ti MLGO-Cabugao
Dagiti kameng ti media (NBN Channel)
Ni SBM Jemaima Tan-Yee, Chairman, Committee on Ecology and Environmental Management
 Kameng ti media (Around Ilocandia Channel)
Taripnong dagiti nakipaset iti Tree Planting

No comments:

Post a Comment