Monday, October 24, 2011

PUBLIC HEARING DAGITI ORDINANSA, INANGAY TI SANGGUNIANG BAYAN

Cabugao, Ilocos Sur (Oktubre 23, 2011) – Inangay ti Sangguniang Bayan, iti ili ti Cabugao ti Public Hearing  babaen ti panangilungalong ni Vice Mayor Danny Q. Gazmen ken kakaduana a  Sangguniang  Bayan Members kadagiti sumaganad a napagsasaritaan: Code of General Ordinances, Community Service Program, 2012 Revenue Code ken Revised NISTC Code.

Paset daytoy ti sirmata   ti Gobierno Munisipal  iti liderato ni Mayor Edgardo “Ediboy”  S.  Cobangbang,  Jr. a pannakapapigsa ken pannakanayon dagiti kasapulan a paglintegan a mangtimon ti natibker  a panagannayas ti  kasasaad ti Gobierno (Good Governance).

Imbinsabinsa ni SB Secretary Maxfel S. Suboc ti mapagsasaritaan, dagiti maseknan nga SB Members a mangtratar agraman ni Mrs. Lourdes Azcueta, Municipal Treasurer a mangilawlawag ti ngumatuan ti pagbayad ti lisensia, fees and charges ken kanaigna a singiren ti Munisipio inton tawen 2012.
Ni SBM Benedict Savellano, Chairman, Committee on Rules ti nangiwanwan ti mapagsasaritaan.
Umuna a nataming ti ordinansa a mangyetnag ti Community Service Program para kadagiti amin nga umili nga agsalungasing  kadagiti naaprobaran nga ordinansa ti ili.


Inlawlawag ni SBM Savellano a saan koma  nga ibilang a pannusa ti panangited ti panawen nga agtrabaho no di ket tapno mabigbig ti nagkamali ti nagbasolanna ken maysa a wagas daytoy ti nasamay a panangbaliw ti galad  (Values Formation) ti maseknan  tapno dinanton uliten.

Nupay kasta, adda met pagpilian ti aglabsing: no la  ket itedna ti multana ket saanen a madanios. Innayon ni ABC President, Rizal Brgy. Captain Teddy U. Soller a panggep daytoy nga ordinansa  a maikkan ti alternatibo a pagpilian ti makabasol tapno saan a “multa” laeng ti maipakpakapet kadagiti ordinansa. Innayon pay ti pannakabagi ti ABC iti Sangguniang Bayan nga iti  panagsalungasing ti linteg-trapiko ti kaaduan a matiltiliw. Sumagmamano pay  a panagsalungasing ket dagiti panagibbet ti  aso ken animal. Nupay kasta, maiyannatup met laeng iti kabaelan ti nagsalungasing iti maipaaramid kenkuana a trabaho kadagiti ag-community service, dinakamatna pay.


Saan a nga isusupiat ti kayat nga ipaawat  dagiti napalubosan a nagsaludsod iti pakabuklan ti “Community Service Program”  ngem ti laeng paggidiatan ti multa ken agtrabaho,  ti klase ti matrabaho ti pinalawlawaganda.


Nupay kasta, imbaga ni SBM Savellano a “draft” pay laeng daytoy nga ordinansa. Innayonna, sagudayen ti proseso ti linteg  a saanda a mabalin nga ipinal ti ordinansa no di aglasat nga umuna  iti public hearing ket maikonsidera dagiti suhestion  a nakalap no maikanatad a mairaman iti mapanday a linteg.

Binagi ni Municipal Treasurer  Lourdes Azcueta a nangilawlawag ti Local Tax Code. Kunana a di maliklikan ti pannakabaliw dagiti alagaden ti panagbayadan ti buis agsipud ta magtenganto manen ti maikalima a tawen nanipud idi naudi a nagbaliw  kas sagudayen ti linteg ti Local Government Code 1991.

Inlatak ti Tesorera-Munisipal dagiti pagbaliwan ti pagbayad inton Tawen 2012. Innayonna nga adda 10% a pagngatuan ti pagbayad iti taripa, fees and other charges maikomperar iti agdama.

Timmaud ditoy a topiko dagiti adu a saludsod kas iti pannakaibaba ti singir nangruna iti danum. Imbaga met  ni Waterworks Superintendent Nestor B. Somera a kayatda a maingato ti singir ti serbisio ti danum gapu ta adu ti agus-usar ti “nabulos” ket aramidenda nga maipangato ti singir  tapno ammoda ti agtiped. Kaaduan a pakaseknan ket maigapu ti  “pupuesto ken  iti panaglakuan ti ikan”  idiay Merkado Publiko (NISTC). Naadaptar dagiti singasing tapno matratar no kaikarianda a mainayon   iti panangsimpada iti pakabuklan dagiti nadakamat a klase ti ordinansa.


Imbaga pay ni SBM Benedict a maipermanente a mailanad iti Website ti Munisipio dagiti ordinansa manipud idi 1946. Innayon met ni SBM Carlito S. Pano, M.D. Vice Chairman, Committee on Rules nga agduduma ti klasena dagitoy nga ordinansa kas iti pakaseknan ti edukasion, aglawlaw, social services, peace and order ken dadduma pay. Kuna ni SBM Pano a ma-update ken mailibro (codification) dagitoy nga ordinansa tapno nalaklakanton  a maawatan ken maammuan dagiti umili.

 Dagiti nagatedar a kameng ti Konseho Munisipal a nagtitinnulong a nangigannuat ti Public Hearing  ket dagiti sumaganad: Vice Mayor Danny Q. Gazmen, SB Secretary Maxfel S. Suboc,  SBM Vicky Serna, SBM Josefina Vallejo, SBM Richard Alcid, SBM Carlito S. Pano, SBM Jemaima Soller Tan-Yee, SBM  Benedicto Savellano, ken ABC President, Rizal Brgy. Captain Teddy U. Soller.

Malaksid kadagiti pannakabagi ti nadumaduma a benneg ti opisina ti LGU, timmaripnong met dagiti agtagikua ti negosio iti uneg ken ruar ti tiendaan, umili a naggapu kadagiti barangays ken sumagmamano a Kapitanes ken taga-pribado a sektor. # (JOED SABIO SAJONIA/Rinetrato, Alvin S. Solis)

No comments:

Post a Comment