Cabugao, Ilocos Sur (Oktubre 16, 2011) – Maysa kadagiti kapatgan a mangsuray ti ekonomia ti maysa nga ili ket ti mapastrek gapu ti kinaaktibo ti negosio iti pagtagilakuan wenno Merkado Publiko.
Tapno matingiting pay iti nasamay a wagas a pangpasayaat ti serbisio kadagiti agtagtagilako ken aggatang, binuangay ni Mayor Ediboy S. Cobangbang, Jr. ti Northern Ilocos Sur Trade Center (NISTC) Task Force a buklen dagiti empleado ken agob-obra iti Munisipio nga idauluan ni Mr. Nestor Somera.
Imbatad ni Mr. Darwin P. Sumibcay, NISTC Task Force Member nga epektibo ti immuna a gay-at ti grupo kas iti pannakasona dagiti amin nga agparpartisipar iti aktibidades iti tiendaan kangrunaan dagiti agtagtagilako, naurnos a panagparking dagiti sumrek a lugan, traysikel ken motorsiklo, pannakamantener ti kinadalus ti aglawlaw ti tiendaan, ken natalinaay a pampanunot dagiti aglako, aggatang, ken bisita nga agpasiar iti uneg ken aglawlaw ti tiendaan.
“Napintas a programa ni Mayor Ediboy ti pannakawaya daytoy aisle ditoy tengnga ta limmawa ken makita dagiti tao a mapan kadagiti panganan ken adda pagsayasayan ti agdudupudop a tattao no kapigsa ti tienda,” inlatak ni Mr. Bernard Vargas, akinkukua ti groseria nga asideg ti aisle. “Kanayonnakami nga umay bisitaen ni Apo Mayor ditoy tiendaan isu a makitana daytoy a pagsaysayaatan ti kaaduan…”
“Saan a pambar ti pannakayakar ti puestok kadagiti aggatang, Apo,” kuna met ni Mr. Mario Rodillas, taga-San Vicente, Ilocos Sur nga aglaklako iti plastic ken cellophane. “Birokendaka ti kustomermo. Displey laeng ti pamay-ak ngem adda aggargaraw a taok nga agipan ti suplay iti uneg tapno adu ti malakuak.”
“Nabayagakon nga agnegnegosio ditoy Cabugao, Barok,” kuna met ni Mr. Ernesto Bumanglag, aglaklako ti kumpay, buneng, kutsilio, tabas ken arado a taga-Brgy. 9 San Lorenzo, San Nicolas, Ilocos Norte. “Napintas ditoy a paglakuan aglalo no panaglalako ti apit, adu ti aggatang ken natalna, naragsak, ken nadayaw ti tattao ditoy.”
Sumagmamano laeng a kapanunotan dagitoy nga agnegnegosio a sumaysayaat ti pulso ti negosio ditoy nga ili.
Inlatak met ni Senior Police Officer I Frazier Simbe, mangkitkita ti linak ken talna ken kadua dagiti naregta a Traffic Safety Officer iti sumrekan ken rummuaran iti tiendaan a naisalumina ita a tawen ta awan iti mapaspasamak nga “untoward incident” iti uneg ken ruar iti tiendaan.
“Mapaboran dagiti agnegosio nangruna ta lepleppas ti apit,” inyisem ni SPOI Simbe. # (Rinetrato ken insurat ni JOED SABIO SAJONIA)
 |
| Ti napanayag a buya ti sango ti Food Court, daydaywen dagiti bisita ken turista |
 |
| Oppps! Tarimnem ti agparking, kabsat, ta adda a nakasiput dagiti agkitkita ti urnos ti parkingan |
 |
| Ti nawayaan nga aisle ti tengnga ti tiendaan. Panganan iti kanawan idinto ta puesto ti agduduma a tagilako iti bangir a kanigid |
 |
| Saan nga umdas ti espasio ti paglakuan isu a temporario a nalinongan iti dalan iti aglawlaw ti tiendaan |
 |
| Makiinnartap met dagiti aggatang ti prutas ken nateng kalpasan a naggapuda iti kaikanan ken kakarnean |
 |
| Uray ti pagtagilakuan ti lupot ket nasapa a nakadusar ta adu ita ti aggatang, katibok ti gapas! |
No comments:
Post a Comment