Cabugao, Ilocos Sur – Nakikaysa ti Gobierno Munisipal ti ili ti Cabugao iti panangidaulo ni Mayor Ediboy S. Cobangbang, Jr. iti “culmination activity” ti maika-111 a tawen a selebrasion ti Philippine Civil Service Anniversary idi Setiembre 30, 2011 nga idauluan ni Dr. Francisco T. Duque 111 babaen ti tema: “Championing R.A.C.E. Public Service Excellence at Full Speed”.
Daytoy a sanga ti Gobierno Nasional (CSC) ket nakikammayet iti LGU’s ditoy Probinsia ti Ilocos Sur a makasakup kadagiti empleado nga agserserbi iti nadumaduma nga opisina ken ahensia iti serbisio-publiko kas ka-partnerna iti pannakaselebrar ti anibersario ti pannakaipasdek ti serbisio-sibil.
Iti pakasaritaan ti Komision ti Serbisio Sibil, naipasdek idi Setiembre 19, 1900 babaen ti Publict Act 5 iti Second Philippine Commission ket nagpaay ni Chief Justice Cayetano Arellano nga immuna a Chairman ken nagdalan ti reorganisasion ken nagtakem agingga iti nagbalin a 3-man Civil Service Commission babaen ti Presidential Decree No. 1 idi Setiembre 24, 1972.
Napili ti Barangay Dardarat, Cabugao, Ilocos Sur a nakaaramidan ti napilida nga aktibidades a kas panagdalus iti igid ti baybay ken panagmula ti mangrove (bakawan), nalatak a klase ti mula iti igid ti baybay a sagiped ti dalluyon ken tumulong a mangprotektar ken mangpreserba ti napintas a pagaponan ti lames-baybay.
Immuna a dimmagas ti grupo ti Civil Service Commission (CSC), Vigan City iti opisina ni Mayor Ediboy ket naaramid ti ababa a panagpapatang. Tinarabay ni Miss Mimi S. Sison, HRMO Officer ti LGU-Cabugao ti grupo ti CSC iti panagturongda sadiay Barangay Dardarat. Nadanonda dagiti empleado a naggapu iti nadumaduma a benneg ti opisina manipud iti Kapitolio Probinsial ken kasta met dagiti dadaulo ti DepEd (elementaria ken high school) iti First District. Ilocos Sur, dadaulo ken empleado ti Departamento ti Agrikultura (LGU-Probinsial ken LGU-Cabugao), HRMO,s ti ili ti Ilocos Sur.
 |
| Dagiti mula a mangrove iti nalayang nga aplaya ti baybay ti Barangay Dardarat |
Grupo-grupo ti timmapog iti aplaya ti Barangay Dardarat a nakaidarnapan ti mula a mangrove (bakawan). Kaaduan kadakuada ti nagikkat ti naisagud nga aragan iti bagi ken sanga dagiti mula a bakawan.
“Dakami ti immuna a nagmula ti bakawan iti igid ti kabaybayan ditoy ilitayo.Pagyamananmi unay ta ditoy ti pakapasamakan dagiti nakallalagip nga aktibidad a kas itoy ken uray kadagiti dadduma a panagtitipon,” imbatad ni Brgy. Captain Danny Garcia, nagaget ken naparato a pangulo ti Barangay Dardarat.
Timmaripnong ken nakitinnakunaynay met ni Mayor Ediboy ket nagallatiw kadagiti kubo nga ayan dagiti nagpartisipar ti anibersario ken nakisarsarita kadagiti sangaili, lumugar, barangay officials ken kakailianna a nagtitipon kadagiti paglinongan iti masakupan ti Sea Garden Project ti Barangay Dardarat.
 |
| Sakbay ti panangaldaw, naggrupo dagiti sangaili ken nagpartisipar ti anibersario ket nagpaalada ti ladawan a pakalaglagipan ti kaaddada iti Barangay Dardarat. |
“Kastoykami a naragsak, Apo,” kuna met ni Kagawad Efren Garcia. “Agyamankami ta mapmapnekkami ti pammadayaw ti kinapintas ti lugarmi!”
Kalpasan ti panagdalus ti kabakawanan (mangrove), naragsak dagiti bisita a nagyaman ken nagpakada iti panagawidda kadagiti taga-LGU, opisiales ti barangay ken lumugar ti Barangay Dardarat a timmaripnong ti anibersario. # (Interbiu/insurat ni JOED SAJONIA/ab photography)
 |
| Dagiti naintar a sementado a paglinongan a tuptuparen ti pariir ti angin nga aggapu iti nalawa nga aplaya iti abagatan ken asideg ti fishcage ti Malaga iti igid ti baybay ti Barangay Dardarat iti laud. |
 |
| Ti sumrekan iti Sea Garden Project ti Barangay Dardarat nga asideg dagiti kubo a naglinongan dagiti sangaili a simmangbay. |
No comments:
Post a Comment