Cabugao, Ilocos Sur (Oktubre 22, 2011) – Tunggal Sabado, madlaw ken mapasingkedan ti iyaaddang ti kasasaad ti Dayo kas ipasimudaag ti makita ken ibaga dagiti tattao a makiparpartisipar kadaytoy a kangrunaan a paguummongan ti tao iti aldaw ti Sabado.
“Pagdidinnamagan ngamin, Apo, isu nga immaykakami met agidayo ditoy Cabugao,” inlatak ni Mr. Marcos Pando, dati a Kapitan ti Barangay Nagbettedan, Sto. Domingo, Ilocos Sur.
Ti barona a simmublat ken agdama a Kapitan ti Brgy. Nagbettedan, Kapitan Mario Pando ti drayber ti kukuana nga elf-truck a luganda nga immay nagidayo ti baka a pamrayanda met sumirpat ti gatangen ken kasinnukatda a taraken.
“Panagkitak ket atiwen ‘toy Dayo- yo ti pappapananmi a kabangibang a Dayo, ‘nong,” inyisem ti agkabannuag a Kapitan Mario. “ Pangatiwna ti kinadalus, napasig ken nadayaw dagiti opisial ti Dayo, napintas ti dissona ta asideg ti karayan, haywey ken asideg ti tiendaan. Adda ditan ti magatang a pamedped a taraon no mabisinka, adda madadaan a kasinnuki ti ilako ken gatangen a taraken, kaaduan a mapaboran ti duma-dayo…”
Imbatad pay ti maysa a Dumadayo a dakkel ti partisipasion ti BARANG-AY FARM ti Gobierno Probinsial a makigamgamulo iti aktibidad ti Dayo ta gatgatangenna dagiti magustuanda a puli ti baka ken nuang para iti programada ti panagpatanor ken panagpataraken.
Mainayon pay a mai-Dayo ket dagiti nabun-as a manok, kawitan ken upa, native ken dadduma a puli ket adu met ti malakuan ti aglako ta kaibatogan la ti presio ti maysa a kilo ti karne ti baboy ken nuang ti balor ti maysa a manok. Kayat met dagiti Dumadayo ken umay ag-sinanglaw ken agbuya ti maallukoy a gumatang ti manok ta kayatda ti rumaman ti maparti a native a manok ket gumatangda ti tagilako.
“Naisigudkamin nga immay naglako nanipud idi nangrugi ti Dayo,” inlatak met ni Mr. Jerry Reyes, akinkukua ti JR Farm ti ili a Solsona, Ilocos Norte. “Innem, walo, sangapulo a burias ti malakuak maminsan a rubuat. Anusanmi met ti umay maki-Dayo ta isu pay a malakuanmi ken malaksid ti lawlawasna a panagpasiarmi nga aglako kadagiti ilin-ili. Obserbarko ket umab-abante ti panagsayaat ti Dayo ditoy Cabugao…”
 |
| Ni Mr. Jerry Reyes, taga-Solsona, Ilocos Norte ken agtagikua ti JR Farm a regular a makiday-Dayo |
Kabayatan ti panagda-Dayo, makitintinnarabay met da Mayor Ediboy, Vice Mayor Danny, SBM Benedict Savellano, ABC President Teddy Soller, MPDC Florante Jara, Ex-Sangguniang Bayan Member Carlos Sison ken dadduma pay a kapitanes.
Aktibo latta met a nakipagtaming kadagiti aktibidad ti Dayo da President Marciano Raciles, Treasurer Rudy Quileza ken Secretary Elpidio Mejia kasta met dagiti pannakabagi ti LGU kas kada Dr. Melvin Castro, Livestock Inspector, Mr. Honorato Castillo ti Tesoreria ti Munisipio ken Mr. Bonifacio Socias, agaywan ti Dayo ken Slaughterhouse nga agasikaso ti papeles dagiti malako ken magatang nga animales. # (JOED SABIO SAJONIA)
 |
| Nakasagana latta dagiti tagilako a naluto a karne ken mamerienda iti amiananen ti Dayo |
No comments:
Post a Comment