Cabugao, Ilocos Sur – Nasapa a dimmanon iti Cabugao Cultural and Sports Complex, Brgy. Rizal, Cabugao, Ilocos Sur dagiti mannalon ti uppat a barangays: Daclapan, Bungro, Cuancabal ken Cuantacla ita nga aldaw, Mayo 14, 2012 a maikalima iti walo nga aldaw a napagkaykaysaan nga eskediul a pannakaibunong ti Fertilizer Subsidy.
Kaaduan ti agkalikagum a maala’t daras ti bagida a ganagan tapno makapagabueltada ta adu pay ti asikasuenda idiay balayda ken talonda.
“Saan itan nga agriri dagiti kusto a mannalon ta isuda ti umawat ti ganagan saan a kas idi nga agkalkalap ti makaawat ti ganagan. Mayat ti ID-System para iti mannalon nga inyetnag ni Apo Mayor Ediboy,” imbatad ni Mr. Ireneo A. Frando, Presidente ti Daclapan Farmer’s Association.
“Mayat daytoy ta sapasap a makaramankami a mannalon iti pagimbagan. Saan a ti bulto ti napateg no di ket iti napintas a pannarabay ti Munisipio kadakami a mannalon,” insupusop met ni Mr. Nestor Baclig ti Barangay Cuancabal, Cabugao. Ilocos Sur.
Ti Ammonium Sulfate a ganagan ket maiyataday unay a mausar iti umay a panagbunubon ti pagay, segun iti kaaduan a mannalon. # (Web In-Action)
No comments:
Post a Comment